ލޯކަލް ގަވަމަންޓް އޮތޯރިޓީ، އެލްޖީއޭގެ ސީއީއޯގެ މަގާމުން މަރިޔަމް ޒުލްފާ ވަކިކޮށް، ފޮރިން މިނިސްޓްރީގެ ސްޓޭޓް މިނިސްޓަރުގެ މަގާމަށް މިއަދު ބަދަލުކޮށްފި އެވެ.

އެލްޖީއޭގެ ސީއީއޯ ކަމުން ވަކިކޮށް ފޮރިން މިނިސްޓްރީއަށް ބަދަލުކުރިކަން ޒުލްފާ ވަނީ އޮންލައިން ނޫހަކަށް ކަށަވަރުކޮށްދެއްވާފަ އެވެ. އޭނާ ވިދާޅުވެފައިވަނީ އެލްޖީއޭއިން ވަކިކުރި ސަބަބު އެނގިވަޑައިނުގަންނަވާ ކަމަށާ، ރައީސް މުހައްމަދު މުއިއްޒުގެ ކޮންމެ ނިންމެވުމަކަށް އިހްތިރާމު ކުރައްވާނެ ކަމަށެވެ.

އޭނާ އެލްޖީއޭގެ ސީއީއޯގެ މަގާމަށް އައްޔަންކުރައްވާފައިވަނީ މިދިޔަ އަހަރުގެ ޑިސެމްބަރު މަހު އެވެ. ޒުލްފާ ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައި ޓޫރިޒަމް މިނިސްޓަރުކަން ކުރައްވާފަ އެވެ.

ރައީސް މުއިއްޒު ވަނީ ދާދިފަހުން ކަސްޓަމްސްގެ ކޮމިޝަނާ ޖެނެރަލްގެ މަގާމުން މާނިއު ވަކި ކުރައްވާ ހޯމްލޭންޑް މިނިސްޓްރީގެ ސްޓޭޓް މިނިސްޓަރުކަމަށް ބަދަލު ކުރައްވާފަ އެވެ. ނަމަވެސް މާނިއު ވަނީ އެ މަގާމުން އިސްތިއުފާ ދެއްވާފަ އެވެ. ފާހަގަކޮށްލެވޭގޮތުގައި ރައީސް މުއިއްޒު މަގާމުން ވަކިކުރައްވާ ބޭފުޅުންނަށް ސްޓޭޓް މިނިސްޓަރުކަން ދެއްވަ އެވެ. އެގޮތުން މިފްކޯގެ ސީއީއޯ ސަމާހް ރަޝީދު ވެސް މަގާމުން ވަކި ކުރެއްވުމަށްފަހު ވަނީ ފިޝަރީސް މިނިސްޓްރީގެ ސްޓޭޓް މިނިސްޓަރުކަމަށް އައްޔަންކުރައްވާފަ އެވެ.