ހުޅުމާލޭ ދެވަނަ ފިޔަވަހީގައި ގާއިމުކޮށްފައިވާ ކިއޮސްކްތައް ކުއްޔަށް ދޫކުރަން ހައުސިން ޑިވެލޮޕްމަންޓު ކޯޕަރޭޝަން (އެޗްޑީސީ)ން މިއަދު ހުޅުވާލައިފި އެވެ.

އެޗްޑީސީން އާންމުކުރި އިއުލާންގައި ބުނީ، ހުޅުމާލޭގައި ގާއިމުކޮށްފައިވާ ވިހި ކިއޮސްކް ކުއްޔަށް ހިފުމަށް ޝައުގުވެރިވާ ފަރާތްތަކަށް ފޯމު ހުށަހެޅުމުގެ ފުރުސަތު ހުޅުވާލައިފައިވާ ކަމަށެވެ.

ކިއޮސްކް ކުއްޔަށް ހިފާމީހުންގެ ޝަރުތުތަކުގެ ތެރޭގައި އުމުރުން 18 އަހަރު ފުރިފައިވާ ދިވެއްސަކަށް ވުމާއެކު ހިޔާ ފްލެޓެއްގެ ވެރިފަރާތްކަމުގައިވުން ނުވަތަ ހިޔާ ފްލެޓުގައި ދިރިއުޅޭ މީހަކަށް ވާންޖެހެ އެވެ. މީގެ އިތުރުން އެޗްޑީސީއަށް އެއްވެސް ފައިސާއެއް ދައްކަން ޖެހި، އެ ފައިސާ ނުދައްކާ މީހެއް ނަމަ ޝަރުތު ހަމަނުވާނެކަމަށް އެ ކޯޕަރޭޝަނުން ބުނެ އެވެ.

ކިއޮސްކްތައް ކުއްޔަށް ދޫކުރާނީ ހުށަހަޅާ ފޯމުތަކުގެ މެދުގައި ގުރުނަގައިގެންކަމަށް އެޗްޑީސީން ބުނެ އެވެ.

މި ކިއޮސްކުތައް ކުއްޔަށް ދެނީ އެއް އަހަރު ދުވަހުގެ މުއްދަތަށެވެ. ކުލީގެ ގޮތުގައި މަހަކު 3،500ރ. ދައްކަން ޖެހެ އެވެ. އަދި އެކުއިޒިޝަން ފީގެ ގޮތުގައި 5،000ރ. ގެ އިތުރުން ލީސް ޑިޕޮސިޓްގެ ގޮތުގައި 10،500ރ. ވެސް ދައްކަން ޖެހެ އެވެ.

އިތުރު މައުލޫމާތު އެޗްޑީސީގެ ވެބްސައިޓުންނާއި އެ ކޯޕަރޭޝަންގެ ނަންބަރު 1516 އަށް ގުޅައިގެން ލިބޭނެ ކަމަށް އެޗްޑީސީގެ އިއުލާނުގައިވެ އެވެ.

ހުޅުމާލެ ދެވަނަ ފިޔަވަހީގެ ބީޗު ސަރަހައްދުގައި ގަވައިދާއި ހިލާފަށް ހަޓްތައް ހަދައިގެން ގިނަބަޔަކު ވިޔަފާރިކުރަމުން ދަނިކޮށް އެޗްޑީސީން އެކަން ހުއްޓުވައި ހަޓުތައް ނަގައި އެތަން ސާފުކޮށް ކިއޮސްކް ހިންގާނެ ޖާގަ ހެދުމަށްފަހު މިވަނީ ކުއްޔަށް ދޫކުރުމަށް އިއުލާންކޮށްފަ އެވެ.