މި ސަރުކާރު އައިފަހުން ސްޓެލްކޯއިން ވަޒީފާ ދިން މީހުންގެ ޖުމްލަ އަދަދާއި ވަކި ކުރި މުވައްޒަފުންގެ ޖުމްލަ އަދަދު ހާމަކުރަން، ސުޕްރީމް ކޯޓުގެ ހުކުމް ބަހަނާއަކަށް ހަދައި ސްޓެލްކޯއިން ދެކޮޅު ހަދައިފި އެވެ.

"ހުރިހާ" އިން ފުރަތަމަ އެދުނީ މި ސަރުކާރު އައިފަހުން ސްޓެލްކޯގެ ވަޒީފާދިން މީހުން ނަމާއި ވަކި ކުރި މީހުންގެ ނަން ހިމެނޭގޮތަށް ޖުމްލަ އަދަދު ހިއްސާކޮށްދިނުމަށެވެ. އެއީ ޒާތީ މައުލޫމާތެއް ކަމަށް ބުނެ، އެ މައުލޫމާތު ދެވެން ނެތް ކަމަށް ސްޓެލްކޯ އިން އެންގި އެވެ.

އެއަށްފަހު "ހުރިހާ" އިން އެދުނީ ހަމައެކަނި ވަޒީފާ ދިން އަދި ވަޒީފާއިން ވަކިކުރި މުވައްޒަފުންގެ ޖުމްލަ އަދަދު ހޯދުމަށެވެ. އޭގެ ޖަވާބުގައި ސްޓެލްކޯ އިން ވަނީ ބީއެމްއެލްގެ ސީއީއޯގެ މުސާރަ ހާމަނުކުރަން ނިންމީ ރަނގަޅަށް ކަމަށް ކަނޑައަޅައި ސުޕްރީމް ކޯޓުން ކުރި ހުކުމާ ހަވާލާތީ މައުލޫމާތު ދެވެން ނެތް ކަމަށް ބުނެފަ އެވެ. ނަމަވެސް ސުޕްރީމް ކޯޓުގެ އެ ހުކުމުގައި ސަރުކާރުގެ ކުންފުނިތަކަކަކީ ވެސް އާރްޓީއައި ހުށަހަޅައިގެން މައުލޫމާތު ހޯދޭނެ ތަންތަނުގެ ގޮތުގައި ކަނޑައަޅާފައިވެ އެވެ.

ސްޓެލްކޯއިން މައުލޫމާތުތައް ސިއްރުކުރަމުންދާއިރު، ދާދިފަހުން ރައީސް ޑރ. މުހައްމަދު މުއިއްޒު ވިދާޅުވެފައި ވަނީ މި ސަރުކާރުން ސިއްރުކުރާނެ އެއްވެސް ކަމެއް ނޯންނާނެ ކަމަށެވެ.