މިދިޔަ އަހަރު ބޭއްވި ރިޔާސީ އިންތިހާބުގެ ކެމްޕެއިންގެ ދުވަސްވަރު އެމްޑީޕީން މޯލްޑިވިއަންއިން ކޮށްފައިވާ ދަތުރުތަކަށް ދައްކަން ޖެހޭ 5.6 މިލިއަން ރުފިޔާ ނުދައްކާ އޮތް މައްސަލައިގައި އެމްޑީޕީ އާއި މޯލްޑިވިއަނުން އެއްބަސްވުމަކަށް ގޮސް، ސިވިލް ކޯޓުގައި އޮތް މައްސަލަ މޯލްޑިވިއަނުން އަނބުރާ ނަގައިފި އެވެ.

އެމްޑީޕީން ނުދައްކާ ހުރީ މިދިޔަ ރިޔާސީ އިންތިހާބުތެރޭ އެ ޕާޓީން އައިލެންޑް އޭވިއޭޝަނުން ނަގާފައިވާ ޓިކެޓާއި ޗާޓާ ފްލައިޓުތަކަށް އަރާ ފައިސާ ކަމަށް މޯލްޑިވިއަނުން ބުނެ އެވެ. އެއީ މިދިޔަ އަހަރުގެ ސެޕްޓެމްބަރު މަހުން ފެށިގެން އޮކްޓޯބަރު މަހާ ހަމައަށް ކޮށްފައިވާ 10 ދަތުރަށްވާ ފައިސާ އެވެ.

އެ ފައިސާ ހޯދުމަށް މޯލްޑިވިއަނުން އެ ޕާޓީގެ މައްޗަށް ދައުވާކޮށް ސިވިލް ކޯޓަށް މިދިޔަ އަހަރު މައްސަލައެއް ވެސް ހުށަހެޅި އެވެ.

ސިވިލް ކޯޓުން އިއްޔެ ކުރި ހުކުމުގައިވާ ގޮތުން މޯލްޑިވިއަނާއި އެމްޑީޕީން ކޯޓުން ބޭރުގައި އެއްބަސްވުމަކަށް އައިސް ދައުވާ ފޯމު ބާތިލްކުރުމަށް ކޯޓަށް ވަނީ ހުށަހަޅައިފަ އެވެ.

ސެޓަލްމަންޓް އެގުރިމަންޓްގައިވާ ގޮތުގެ މަތިން ފުރަތަމަ އިންސްޓޯލްމަންޓަކަށް 1 މިލިއަން ރުފިޔާ އެމްޑީޕީން ވަނީ މޯލްޑިވިއަނަށް ދައްކާފަ އެވެ.