ވަޒީފާގެ މާހައުލުގައި އަންހެނުންނަށް ފުރައްސާރަކޮށް، އަންހެނުންގެ ހައްގުތަކަށް އަރައިގަތުމަށް ސަރުކާރުން ހިންގާ އަމަލުތައް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އަންހެނުންގެ ރޫހުގެ ފަރާތުން ކުށްވެރި ކޮށްފި އެވެ.

އަންހެނުންގެ ރޫހުގެ ފަރާތުން ނެރުނު ނޫސް ބަޔާނެއްގައި ބުނީ އިޖުތިމާއީ، އިގްތިސާދީ އަދި ސިޔާސީ ރޮނގުން އަންހެނުން ބާރުވެރި ކުރުމަށް އެމްޑީޕީން ގިނަ މަސައްކަތްތަކެއް ކޮށް ބޮޑެތި ކުރިއެރުންތަކެއް ހޯދާފައި ވަނިކޮށް، ޕީޕީއެމް/ޕީއެންސީގެ ސަރުކާރު ވެރިކަމަށް އައުމަށްފަހު އަންހެނުންނަށް ލިބޭ ފުރުސަތު ހަނިކޮށްފައިވާ ކަމަށެވެ.

"އެތައް ޒަމާނެއް ވަންދެން ސިވިލް ސާވިސްގައި މަސައްކަތް ކޮށްފައި ތިބި ތައުލީމީ، ތަޖުރިބާކާރު، ފަންނީ މުވައްޒަފުންނަށް މި ސަރުކާރުން ސިޔާސީ ބޭނުމަށްޓަކައި ވަޒީފާގެ ބިރު ދައްކައި ނަފްސާނީ ގޮތުން ގެއްލުންދީ، އެމީހުންގެ އަސާސީ ހައްގުތަކުން އަރައިގަންނަމުންދާ މައްސަލަ މި ޕާޓީން ހަރުކަށި އިބާރާތުން ކުށްވެރި ކުރަން،" އެ ޕާޓީން ބުންޏެވެ.

"އެމްޑީޕީގެ ސަރުކާރުގެ ފަސް އަހަރު ތެރޭގައި އަންހެނުންނަށް ކުރިމަތިވާ ގޮންޖެހުންތައް ނައްތާލުމަށް މަސައްކަތްކޮށް، މުޖުތަމައުގެ ހުރިހާ ދާއިރާއެއްގައި އަންހެނުންނަށް ފުރިހަމައަށް، ބިނާކުރަނިވި ގޮތެއްގައި ބައިވެރިވެވޭނެކަން ކަށަވަރުކޮށްދިނުމަށް ކުރަމުން އައި މަސައްކަތްތައް މިއަދު މިވަނީ ހުއްޓުމަކަށް އައިސްފާކަން ހިތާމައާއެކު މި ޕާޓީއިން ފާހަގަކުރަމެވެ." އެމްޑީޕީން ބުނެފައިވެ އެވެ.

އެމްޑީޕީ އިން ވަނީ ޔޫއެންޑީޕީ އާއި ގުޅިގެން މިދިޔަ ސަރުކާރުން އެކުލަވާލި ޖެންޑާ އީކުއޭލިޓީ އެކްޝަން ޕްލޭންގައި މިއަހަރު ކުރަން ހުރި މަސައްކަތްތައް ހިނގަމުންދާ ގޮތުގެ ތަފުސީލު ސަރުކާރުން ހާމަނުކުރާތީ ކަންބޮޑުވުންފާޅުކޮށްފަ އެވެ.

އަންހެނުންގެ ތަރައްގީއަށް މަސައްކަތެއް ނުކުރެވުނުއިރު ސަރުކާރުން އަންހެނުންނަށް ކުރާ ފުރައްސާރަ އިތުރުވަމުންދާ ކަމަށް އެމްޑީޕީ އިން ބުނެ އެވެ.

އެމްޑީޕީ އިން ބުނެފައިވާ ގޮތުގައި 20 ވަނަ ރައްޔިތުންގެ މަޖިލީހުގައި ސަރުކާރަށް ނިސްބަތްވާ މެމްބަރުން އަންހެނުންނަށް ކުޑައިމީސްވާ ގޮތަށް އަންހެނުންގެ ގަދަރަށް އުނިކަން ލިބޭފަދަ ގޮތަށް މަޖިލީހުގެ ތަޅުމުގައި ތަކުރާރުކޮށް ވާހަކަ ދައްކަމުންދާއިރު ސަރުކާރުން މިކަމުގައި ހަނުހުރުމަކީ މި ސަރުކާރުން މިފަދަ ކަންކަމުގައި ދެކޭ ގޮތް ސާފުކޮށް ހާމަކޮށްދޭ ކަމެއް ކަމަށެވެ.