އދ. ގެ 79 ވަނަ އަހަރީ އާންމު ޖަލްސާގައި ބައިވެރިވެވަޑައިގަތުމަށް އެމެރިކާގެ ނިއުޔޯކަށް ރައީސް ޑރ. މުހައްމަދު މުއިއްޒު ކުރެއްވި ދަތުރަށް 2.4 މިލިއަން ރުފިޔާ ހަރަދުކުރި ކަމަށް ރައީސް އޮފީހުން ބުނެފި އެވެ.

ރައީސް އޮފީހުން ބުނީ ސެޕްޓެމްބަރު 20 އިން 29 އަށް ކުރެއްވި އެ ދަތުރުފުޅަށް 2,455,583.01ރ. ހަރަދުކުރި ކަމަށެވެ. އެ ފައިސާ ހަރަދުކުރި ދާއިރާތަކުގެ އެއްވެސް ތަފްސީލެއް ހާމަނުކުރެ އެވެ.

އެ ދަތުރުފުޅުގައި އެމަނިކުފާނާ އެކު ވަޑައިގެންނެވި ވަފްދުގެ ޖުމްލަ އަދަދާއި އެ އެންމެންގެ ކެއުމަށް ހަރަދުވި ފައިސާގެ އަދަދެއް ރައީސް އޮފީހުން ހާމައެއް ނުކުރެ އެވެ.

އެމަނިކުފާނާއެކު އދ. އަށް ވަޑައިގެންނެވި ބޭފުޅުންގެ ތެރޭގައި އޭރުގެ ފޮރިން މިނިސްޓަރު މޫސާ ޒަމީރާއި އެންވަޔަރަމަންޓު މިނިސްޓަރު ތޯރިގު އިބްރާހިމް ހިމެނިވަޑައިގަންނަވަ އެވެ.

އެ ބައްދަލުވުމުގައި ގިނަ ކަންތައްތަކެއް ރާއްޖެއަށް ފަހިވި ކަމަށް ރައީސް އޮފީހުން މީގެކުރިން ބުނެފައިވެ އެވެ. އެކަމަކު އޭގެ އެ އޮފީހުން ހިއްސާއެއް ނުކުރެ އެވެ.