ބޮލީވުޑް އަދި ހޮލީވުޑްގެ މަޝްހޫރު ތަރި ޕްރިޔަންކާ ޗޯޕްރާ ސްވިޓްޒަލޭންޑްއަށް ކުރާ ދަތުރުގައި އެގައުމުގައި ނަގާފައިވާ ބައެއް ފޮޓޯތައް އޭނާގެ ސޯޝަލް މީޑިއާގައި ދަނީ ހިއްސާ ކުރަމުންނެވެ.

އެގޮތުން އެންމެ ފަހުން އޭނާ ހިއްސާކުރި ފޮޓޯއާތަކާއެކު ބޮލީވުޑް ފިލްމެއްގެ އިހުސާސް އޭނާގެ ސަޕޯޓަރުންނަށް މިވަނީ ގެނެސްދީފަ އެވެ.

ނޫ ކުލައިގެ ސާރީއެއްގެ މަތިން ކޯޓެއް ލައިގެން ސްނޯ މަތީގައި ޕްރިޔަންކާ ނަގާފައިވާ ފޮޓޯތަކަކީ ބޮލީވުޑްގެ ގިނަ ފިލްމުތަކަކުން ފެނިފައިވާ މަންޒަރުތަކާ ދާދި އެއްގޮތް މަންޒަރުތަކެއް ފެންނަ ފޮޓޯތަކެކެވެ.

އެ ފޮޓޯއާއެކު ޕްރިޔަންކާ ބުނެފައިވަނީ އޭނާގެ "ބޮލީވުޑް ހުވަފެން" ފުރިހަމަވީ ކަމަށެވެ. އެ ބުނުމުން އޭނާ އިޝާރާތްކޮށްފައި އެވަނީ ބޮލީވުޑްގެ ފިލްމުތަކުން ފެންނަ ފަދަ ފޮޓޯތަކެއް ނެގުމަށެވެ.

ގިނަ ފޮޓޯތަކެއް އެކުލަވާލައިގެން ހަދާފައިވާ އެ ވީޑިއޯއަށް ޕްރިޔަންކާ ވަނީ ބޮލީވުޑްގެ މަޝްހޫރު ލަވައެއް ކަމަށްވާ "އޮ މެރީ ޗާންދްނީ" ބޭނުންކޮށްފަ އެވެ.

ޕްރިޔަންކާގެ ފިލްމީ މަސައްކަތްތަކަށް ބަލާއިރު އޭނާ މިހާރު މަސައްކަތް ކުރަމުން އަންނަނީ ސިޓަޑޭލް ސީޒަން 2ގަ އެވެ. އޭގެ އިތުރުން ފިލްމު "ބްލަފް"އިން ވެސް އޭނާ ފެންނާނެ އެވެ.