ޖެރޫސަލަމް (ނޮވެމްބަރު 6)- "އިތުބާރު ގެއްލުމުން" އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އެ ގައުމު ޑިފެންސް މިނިސްޓަރު ޔޮއާވް ގަލަންޓް ކުއްލި ގޮތަކަށް މިއަދު މަގާމުން ދުރުކޮށްފި އެވެ.

ނަތަންޔާހޫ ނެރުއްވި ބަޔާނެއްގައި ބުނީ ފާއިތުވި މަސްތަކުގައި ގަލަންޓަށް ކުރާ އިތުބާރު "ގެއްލިފައިވާ" ކަމަށާއި ގަލަންޓްގެ ބަދަލުގައި ޚާރިޖީ ވަޒީރު އިޒްރޭލު ކާޓްޒް އަންނާނެ ކަމަށެވެ. އަދި އާ ޚާރިޖީ ވަޒީރަކަށް އައްޔަން ކުރަން ނިންމާފައި ވަނީ ނަތަންޔާހޫގެ އެހެން އެކުވެރިއެއް ކަމަށްވާ ގިޑިއޯން ސާރް އެވެ. އޭނާއަކީ ކުރިން ކެބިނެޓްގެ އެއްވެސް މަގާމެއް ފުރާފައި ނުވާ މީހެކެވެ.

ގަލަންޓް ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ "އިޒްރޭލްގެ ދައުލަތުގެ ސަލާމަތަކީ އަހަރެންގެ ހަޔާތުގެ އަމާޒެއް ކަމަށާއި އަބަދުވެސް އެކަން ދެމިއޮންނާނެ" ކަމަށެވެ.

ގަލަންޓް މަގާމުން ވަކިކުރުމާ ގުޅިގެން ޓެލްއަވީވްގެ މަގުތަކުގައި މުޒާހަރާތައް ވަނީ ފަށައިފަ އެވެ. އަދި ސިޔާސީ އިދިކޮޅު ލީޑަރުން ގެންދަވަނީ އާންމުންގެ މުޒާހަރާތައް ވަރުގަދަ ކުރުމަށް ގޮވާލަމުންނެވެ.

ގެލެންޓް މަގާމުން ދުރުކުރުމުގެ މަސައްކަތް ނިމޭނީ ކުރިޔަށް އޮތް 48 ގަޑިއިރުގެ ތެރޭގަ އެވެ. އާ ވަޒީރުން އައްޔަން ކުރުމަށް ފަހު ސަރުކާރާއި ގާނޫނު ހަދާ މަޖްލިސް ނެސެޓްގެ ރުހުން ހޯދަން ޖެހެ އެވެ.

ނަތަންޔާހޫ އެންމެ ފުރަތަމަ ގަލަންޓް މަގާމުން ވަކިކުރީ އިޒްރޭލްގެ އަދުލު އިންސާފުގެ ނިޒާމަށް ގެންނަން މަސައްކަތްކުރި ބަދަލުތަކާ ދެކޮޅުހެދުމުން 2023 ވަނަ އަހަރުގެ މާޗް މަހުގެ ތެރޭގަ އެވެ. -- ބީބީސީ