އެމެރިކާގެ ކެރޮލައިނާގެ ރިސާޗް ފެސިލިޓީއަކުން 43 ރާމާމަކުނު ދޫވުމުން މަކުނުތައް ހޯދުމަށް ފުލުހުން މަސައްކަތް ކުރަން ފަށައިފި އެވެ.

މެޑިކަލް ޓެސްޓިން އަދި ރިސާޗަށް ޕްރައިމޭޓުން އާލާކުރާ ކުންފުންޏެއް ކަމުގައިވާ އަލްފާ ޖެނެސިސްއިން ފިލައިގެން ދިޔަ ރީސަސް މެކާކު ރާމާމަކުނުތައް ދޫވެފައިވަނީ އެތަން ބަލަހައްޓާ މީހަކު ގޮޅި ހުޅުވާފައި ބެހެއްޓުމުން ނެވެ.

އެމެރިކާ ފުލުހުންވަނީ އެ ސަރަޙައްދުގެ ރައްޔިތުންނަށް ގެތަކުގެ ދޮރުތަކާއި ކުޑަދޮރުތައް ރަނގަޅަށް ބަންދުކޮށްފައި ބެހެއްޓުމަށާއި، މަކުނެއް ފެނިއްޖެނަމަ ވަގުތުން އެކަން އަންގަން އިލްތިމާސްކޮށްފަ އެވެ. ޔެމަސީ ފުލުސް ޑިޕާޓްމަންޓުން ބުނާ ގޮތުގައި ފިލައިގެން ދިޔަ މަކުނުތަކަކީ ކުދި އަންހެން މަކުނުތަކެއް ކަމަށާއި، ކޮންމެ މަކުނެއްގެ ބަރުދަނަކީ 7 ޕައުންޑު (3.2 ކިލޯގްރާމް) ކަމަށެވެ.

އެއްވެސް ހާލެއްގައި މި ޖަނަވާރުތަކާ ކައިރިވާން މަސައްކަތް ނުކުރުމަށް އެދޭ ކަމަށް ފުލުހުން ބުނެފައިވެ އެވެ. ފުލުހުންގެ ބަޔާނުގައި އިތުރަށް ބުނެފައިވަނީ އެ ސަރަހައްދުގައި ޖަނަވާރުތައް ހޯދުމަށް ތާމަލް އިމޭޖިން ކެމެރާތައް ބޭނުންކުރަމުންދާ ކަމަށެވެ.

ފުލުހުން ބުނާ ގޮތުގައި ރިސާޗް ކުންފުނިން އެމީހުންނަށް އަންގާފައިވަނީ މަކުނުތަކުގެ ސައިޒަށް ބަލާއިރު، އަދި އެ ތަކެއްޗަށް ޓެސްޓެއް ކޮށްފައި ނުވާ ކަމަށާއި ބަލި ފެތުރުމަށް މި މަކުނުތައް އަދި ކުޑަކަމަށެވެ.