ހަޔާ އެޑިއުކޭޝަން މިނިސްޓްރީން އިންތިޒާމް ކޮށްގެން ކުރިއަށް ގެންދިޔަ ދާލަން ކެރިއާ އެކްސްޕޯގައި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސްޓޯލަށް ބޮޑުތަރުހީބެއް ލިބިއްޖެ އެވެ.

މި މަހުގެ 15 އިން 16އަށް ހުޅުމާލޭ ސެންޓްރަލް ޕާކުގައި ކުރިއަށް ގެންދިޔަ މި އެކްސްޕޯގައި އެމްއޭސީއެލްގެ ސްޓޯލަށް ޖުމްލަ 3،377 މީހުން ވަނީ ޒިޔާރަތްކޮށްފަ އެވެ. އަދި އޭގެ ތެރެއިން 600 މީހުން ވަޒީފާއަށް އެދި ފޯމު ފުރިހަމަކޮށްފައިވާއިރު، 103 މީހަކު ވަނީ އިންޓާންޝިޕް ފުރުސަތުގައި ބައިވެރިވުމަށް އެދި ފޯމު ފުރިހަމަ ކޮށްފަ އެވެ. މިއެކްސްޕޯގައި އެމްއޭސީއެލްގެ 20 ޑިޕާޓްމަންޓަކުން ބައިވެރިވެ، ވެލާނާ އިންޓަނޭޝަނަލް އެއާޕޯޓުގެ އޮޕަރޭޝަންސް ކުރިއަށްދާ ގޮތާއި، ކުރެވޭ މުހިއްމު މަސައްކަތްތައް ދައްކާލާފައި ވެ އެވެ.

މިގޮތުން އެމްއޭސީއެލްގެ ވަޒީފާއަށް ކުރިމަތިލި މީހުންގެ ތެރެއިން ހަތަރު މީހަކަށް ފެއާގެ ތެރެއިން ވަނީ ވަޒީފާގެ ލިޔުން ހަވާލުކޮށްފަ އެވެ. މިފަރާތްތަކަށް ވަޒީފާގެ ލިޔުން ހަވާލުކޮށްދެއްވީ އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރު މުޖްތަބާ ލަތީފެވެ. އަދި ބާކީ ހުރި އެޕްލިކޭޝަންތައްވެސް ޕްރޮސެސް ކުރުމަށްފަހު އިތުރު މީހުންނަށް ވަޒީފާގެ ފުރުސަތު ތަނަވަސް ވެގެންދާނެ އެވެ. މީގެ އިތުރުން ސްޓޯލަށް ޒިޔާރަތްކޮށް ރެޖިސްޓާ ކުރި މީހުންގެ މެދުގައި ނެގި ގުރުއަތުން ހޮވުނު ފަސް މީހަކަށް ލެޕްޓޮޕް އަދި 10 މީހަކަށް އެހެނިހެން ހަދިޔާތައް ދީފައި ވެ އެވެ.

މި އެކްސްޕޯގެ މައިގަނޑު މަގްސަދަކީ ވަޒީފާ ހޯދާ ފަރާތްތަކާއި ވަޒީފާދޭ ފަރާތްތަކުގެ ގުޅުވައި ދިނުމެވެ. މި އެކްސްޕޯގައި އެމްއޭސީއެލް އިން ބައިވެރިވެފައިވަނީ ރާއްޖޭގެ އިގްތިސާދާއި، ކުރިއަރަމުން އަންނަ އޭވިއޭޝަން ދާއިރާގައި ޒުވާނުންނަށް ހުޅުވިފައިވާ ވަޒީފާގެ ފުރުސަތުތައް ދައްކުވައިދިނުމުގެ މަގުސަދުގަ އެވެ.