ކަރަންޓު ބިލް ފަހަކަށް އައިސް އިންތިހާއަށް ބޮޑުވެ، ރައްޔިތުން ޝަކުވާކުރަމުން ދަނިކޮށް މިއަހަރު ނިމޭއިރު ސާފު ފައިދާގެ ގޮތުގައި 120 މިލިއަން ރުފިޔާ ލިބޭނެ ކަމަށް ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވިދާޅުވެއްޖެ އެވެ.

ކަރަންޓު ބިލް ބޮޑުވަމުން އަންނަ މައްސަލައާ ގުޅިގެން ސްޓެލްކޯއިން އެ ގޭބިސީތަކަށް ގޮސް އެނާޖީ އޮޑިޓެއް ހަދަން މިދިޔަ އޮގަސްޓް މަހު ނިންމި އެވެ. ނަމަވެސް މިއަދާ ހަމަޔަށް އެ އޮޑިޓާ ގުޅޭ އެއްވެސް މައުލޫމާތެއް އެ ކުންފުނިން ހާމައެއް ނުކުރެ އެވެ.

ރައީސް މުހައްމަދު މުއިއްޒުގެ ސަރުކާރަށް އެއް އަހަރު ފުރުމާ ގުޅިގެން ސަރުކާރުން ހިންގާ ޕީއެސްއެމްއަށް ދިން އިންޓަވިއުއެއްގައި ވިދާޅުވީ މިދިޔަ އަހަރަކީ ސްޓެލްކޯއަށް ގެއްލުމުގައި ހިންގި އަހަރެއް ކަމަށެވެ. ނަމަވެސް މި އަހަރު ނިމިގެންދާނީ ފައިދާއާއެކު ކަމަށް އޭނާ ވިދާޅުވި އެވެ.

"2023 ވަނަ އަހަރަކީ އަޅުގަނޑުމެންނަށް 20 މިލިޔަން ރުފިޔާގެ ގެއްލުން ލިބުނު އަހަރެއް. އެހެންނަމަވެސް އިރާދަކުރެއްވިއްޔާ 2024 ވަނަ އަހަރު ނިމިގެންދާނީ 120 މިލިޔަން ރުފިޔާގެ ފައިދާއަކާއެއްކޮށް. އަޅުގަނޑުމެންގެ ނަތީޖާ ވަރަށް ވެސް ރަނގަޅު،" ފަހުމީ ވިދާޅުވި އެވެ.

ފަހުމީ ވިދާޅުވީ އަންނަ އަހަރު ނިމުމުގެ ކުރިން ސްޓެލްކޯގެ ހުރިހާ ކަސްޓަމަރުންނަށް ސްމާޓް މީޓަރު ފޯރުކޮށްދޭނެ ކަމަށެވެ. އަދި މިއަހަރު ނިމުމުގެ ކުރިން ހުޅުމާލެ 2 ވަނަ ފިޔަވަހީގައި ސްމާޓް މީޓަރު ހަރުކުރުމުގެ މަސައްކަތް ފަށާނެ ކަމަށް އޭނާ ވިދާޅުވި އެވެ.

ފަހުމީ ވިދާޅުވީ ސްމާޓް މީޓަރު ޕްރޮޖެކްޓާއެކު ކަރަންޓް ބިލް ބޮޑުވެގެން ކަސްޓަމަރުންގެ ފަރާތުން އަންނަ ކަންބޮޑުވުންތަކަށް ހައްލު ލިބޭނެ ކަމަށެވެ.

އޭނާ ވިދާޅުވީ މިދިޔަ އެއް އަހަރު އެއްވެސް މުވައްޒަފަކު ވަޒީފާއިން ވަކި ނުކުރާ ކަމަށެވެ. އަދި މުވައްޒަފުންގެ ހުރި ނުތަނަވަސްކަން ހައްލުކޮށްފައިވާ ކަމަށް ވެސް ފަހުމީ ވިދާޅުވި އެވެ.