ކުރީގެ ނައިބު ރައީސް އަދި މިހާރު މޯލްޑިވްސް އިންޓަނޭޝަނަލް ފައިނޭންޝަލް ސާވިސަސް އޮތޯރިޓީގެ ޗެއާޕާސަން އަބްދުﷲ ޖިހާދުގެ މައްޗަށް ކ. ފުށިދިއްގަރު ފަޅު މައްސަލައިގައި ކޮށްފައިވާ ދައުވާ ހައިކޯޓުން ބަލައިނުގަންނަން ރަޖިސްޓްރާ ނިންމި ނިންމުން ރަނގަޅުކަމަށް އެކޯޓުގެ ފަނޑިޔާރުންގެ މަޖިލީހުން ނިންމައިފި އެވެ.

ޖިހާދުގެ މައްޗަށް ދައުލަތުން ދައުވާކުރީ 2013 ވަނަ އަހަރު ފިނޭންސް މިނިސްޓަރަކަށް ހުންނެވިއިރު ފުށިދިއްގަރުފަޅުގެ އެއްބަސްވުމުގައި ސޮއި ކުރެއްވުމުގައި ދައުލަތަށް ފައިދާނުވާ ގޮތަށް އަމަލު ކުރެއްވި ކަމަށް ބުނެ އެވެ. އެ މައްސަލާގައި ޖިހާދުގެ މައްޗަށް ކުރީ ދައުލަތަށް ފައިދާވާން އޮތް ކަމެއްގައި އެ ނޫން ގޮތަކަށް އަމަލު ކުރުމުގެ ދައުވާ އެވެ.

އެ މައްސަލަ ކްރިމިނަލް ކޯޓުން ކުރިއަށް ނުގެންދެވޭނެ ކަމަށް ނިންމީ ތަހުގީގުގައި ގޯސްތަކެއް ހަދާފައިވާތީ ކަމަށް ބުނެ އެވެ. އެހެންވެ، ދައުލަތުން ހައި ކޯޓުގައި އެދިފައި އޮތީ އެ މައްސަލަ ކްރިމިނަލް ކޯޓުން އަލުން ބަލަން އަމުރުކޮށް ދިނުމަށެވެ.

މައްސަލަ ހައިކޯޓަށް ހުށަހެޅުމުން، އެ ކޯޓުން ވަނީ އިޖުރާއީ ނިންމުމުގައި ކޯޓަށް ހާޒިރުވުމުގެ އަމުރު ޖިހާދަށް ރައްދު ނުކުރެވޭކަމަށް ބަޔާންކޮށް، އޭނާ ކޯޓަށް ހާޒިރުކުރެވޭނެ އިންތިޒާމު ހަމަޖެއްސުމަށްފަހު އަލުން ހުށަހެޅުމަށް 15 ދުވަހުގެ މުއްދަތެއްދީ، މައްސަލަ އަނބުރާ އަނބުރާ ޕީޖީ އޮފީހަށް ފޮނުވާލާފަ އެވެ. އޭގެ ފަހުން ޖިހާދުގެ މައްސަލަ އަލުން ހުށަހެޅުމަށް ޕީޖީއަށް އިތުރު ފުރުސަތެއް ދިނެވެ. އެ ފުރުސަތު ހަމަވީ އޮކްޓޯބަރު 13 ވަނަ ދުވަހަށެވެ.

ނަމަވެސް، ޕީޖީން ޖިހާދުގެ މައްސަލައިގެ އިސްތިއުނާފު އަލުން ހުށަހެޅީ އެ ކޯޓުން ދިން މުއްދަތުގެ ދެ ދުވަސް ފަހުން ކަމަށްވާތީ، އެ މައްސަލަ އެ ކޯޓަށް ބަލައިނުގަތުމަށް ހައި ކޯޓުން ވަނީ ނިންމާފަ އެވެ.

އޭގެ ފަހުން ޕީޖީ އޮފީހުންވަނީ ރަޖިސްޓްރަރގެ ނިންމެވުން ކޯޓުތަކުގެ ޤާނޫނުގެ 42 ވަނަ މާއްދާއާއި، ހައިކޯޓުގެ ގަވާއިދުގެ 29 ވަނަ މާއްދާއާ ފުށޫއަރާކަމަށް ފެންނަ ކަމަށް ބުނެ، އެ ނިންމެވުން މުރާޖަޢާކޮށްދެއްވުން އެދި އޮކްޓޯބަރު މަހުގެ 30ގައި ހައިކޯޓުގެ ފަނޑިޔާރުންގެ މަޖިލީހަށް ހުށަހަޅައިފަ އެވެ.

އެ މައްސަލަ ބެއްލެވި ތިން ފަނޑިޔާރުންގެ ތެރެއިން، ފަނޑިޔާރު ހުޒައިފާ މުޙައްމަދުގެ ރައުޔުގައިވަނީ މައްސަލަ ހުށަހެޅީ މުއްދަތު ފާއިތުވި ފަހުން ކަމަށެވެ. އެހެންކަމުން މުއްދަތަށް ހުށަހަޅައިފައިނުވާ ކަމަށް ބަލައި، އިސްތިއުނާފު ބަލައި ނުގަތުމަށް ނިންމި ނިންމުން ބަދަލުކުރަން ޖާގަ އޮތްކަމަށް ނުފެންނަ ކަމަށެވެ. އެ ރައުޔަށް ފަނޑިޔާރު ދީބާނާޒް ފަހުމީ ތާއީދުކުރެއްވި އެވެ.

ކޯޓަށް މައްސަލަ ބަލައިގަތުމަށް ފެންނަކަމަށް ވިދާޅުވީ ހަމައެކަނި ފަނޑިޔާރު ހަސަން ޝަފީއު އެވެ.