ބޮލީވުޑްގެ އެންމެ ނުފޫޒުގަދަ އާއިލާގެ ގޮތުގައި ބެލެވޭ ކަޕޫރު އާއިލާގެ ގިނަ މެމްބަރުންތަކެއް އިންޑިއާގެ ބޮޑުވަޒީރު ނަރެންދްރަ މޯދީއާ ބައްދަލުކޮށްފި އެވެ.

ކަޕޫރު އާއިލާއިން މޯދީއާ ބައްދަލު ކޮށްފައިވަނީ އިއްޔެއިން ފެށިގެން މާދަމާގެ ނިޔަލަށް ކުރިއަށްދާ "ރާޖް ކަޕޫރު ފިލްމު ފެސްޓިވަލް"ގެ ދައުވަތު މޯދީއަށް އަރުވަން ވެގެންނެވެ. އެ އާއިލާއިން މޯދީއާ ބައްދަލު ކުރަން ދިޔަ ވަފްދުގެ ތެރޭގައި ކަރީނާ ކަޕޫރު، ސައިފް އަލީ ޚާން، ކަރިސްމާ ކަޕޫރު، ރަންބީރު ކަޕޫރު، އާލިއާ ބަޓް އަދި ނީތޫ ސިންހް ހިމެނެ އެވެ.

މި ބައްދަލުވުމުގެ ފޮޓޯތައް މިހާރު ސޯޝަލް މީޑިއާގައި ދައުރުވަމުން އަންނައިރު މި ބައްދަލުވުމާ ގުޅިގެން އިންޑިއާގެ މީހުންގެ ހިޔާލު ވަނީ ވަރަށް ބޮޑަށް ތަފާތުވެފަ އެވެ.

"ރާޖް ކަޕޫރު ފިލްމު ފެސްޓިވަލް"އަކީ ބޮލީވުޑްގެ ކުރީގެ އެންމެ ފުންނާބު ތަރި އަދި ކަޕޫރު އާއިލާގެ ބާނީ ރާޖް ކަޕޫރުގެ 100 ވަނަ އުފަން ދުވަހުގެ މުނާސަބަތުގައި ބާއްވާ ފެސްޓިވަލް އެކެވެ.

އެ ފެސްޓިވަލްގައި ރާޖް ކަޕޫރުގެ ބޮލީވުޑް ހަޔާތުގައި އޭނާ ކުޅެފައިވާ މަޝްހޫރު ބައެއް ފިލްމުތައް އަލުން އަޅުވާނެ ކަމަށް ހަބަރުތައް ބުނެ އެވެ.

ރާޖް ކަޕޫރަކީ މިއަދު ބޮލީވުޑުން ފެންނަ ކަޕޫރު އާއިލާގެ މަޝްހޫރު ތަރިން ކަމަށްވާ ކަރީނާ، ކަރިސްމާ އަދި ރަންބީރުގެ ކާފަ އެވެ.