ވެހި ޕޯޓަލް އަދި ހައުސިން މިނިސްޓްރީގެ ޑޭޓާ ބަލަހައްޓަމުން ގެންދިޔަ ގޮތް ކަމުނުދާތީ ޓެކްނޮލޮޖީ މިނިސްޓްރީން 2019ގައި އެންގުމުން ހައުސިން މިނިސްޓްރީން ދެކޮޅު ހެދި ކަމަށް ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެ އެވެ.

މިދިއަ ބުރާސްފަތި ދުވަހު ހައުސިން މިނިސްޓްރީގެ އިމާރާތުގައި އަލިފާން ރޯވީ މި ހާދިސާ ހިނގީ އެ ދުވަހު ހެނދުނު ގާތްގަނަޑަކަށް 6:30 ކަންހާއިރުގަ އެވެ. އެ އިމާރާތުގައި ރޯވި މި އަލިފާންފަނޑު ނިއްވާނުލެވި ގިނަ އިރުތަކެއް ވެފައިވާއިރު، އެ އިމާރާތް ވަނީ އެއްކޮށް އަނދާ ހުލިވެފަ އެވެ.

އެ އަލިފާނުގެ ހާދިސާގައި ހައުސިން މިނިސްޓްރީއާ އެކު އެ އިމާރާތުގައި ހިންގަމުން ދިޔަ ކޮންސްޓްރަކްޝަން މިނިސްޓްރީ ވެސް އަނދައިގެން ގޮސް، ކައިރީގައި ހުރި ތިން އިމާރާތަކަށް ވެސް ބޮޑެތި ގެއްލުންތަކެއް ވަނީ ލިބިފަ އެވެ.

ހައުސިން މިނިސްޓްރީ ހުންނަ އިމާރާތުގައި ހިނގި އަލިފާނުގެ ބޮޑު ހާދިސާއާ ގުޅިގެން އެ ތަނުގެ ސާވާތައް ސަލާމަތްވާނެ ކަމަށް ނުބެލެވޭ ކަމަށް ހައުސިން މިނިސްޓަރު ޑރ. އަލީ ހައިދަރު ވަނީ އިއްޔެ ނޫސްވެރިންނާއެކު ބޭއްވި ބައްދަލުވުމެއްގައި ވިދާޅުވެފަ އެވެ.

ހައުސިން މިނިސްޓަރު ހައިދަރުގެ މި ވާހަކަތަކަށް ރައްދުދެއްވައި އެކްސްގައި ކުރެއްވި މެސެޖެއްގައި މަލީހު ވިދާޅުވީ ޑޭޓާތައް ހަމައެކަނި ހައުސިން މިނިސްޓްރީގައި ހުރި ލޯކަލް ސާވާގައި ހުރި ލޯކަލް ސާވާގައި ބެކަޕްކުރުމަކީ ފަރުވާކުޑަކަމުގެ އަމަލެއް ކަމަށާއި އަދި ސަރުކާރުގެ ހުރިހާ އިދާރާއެއްގެ ބެކްއަޕް އެންސީއައިޓީގެ ޑޭޓާ ސެންޓަރުގައި ރައްކާކުރުން މުހިންމު ކަމަށެވެ.

ސަރުކާރުގެ ޑޭޓާ ރާއްޖޭގެ ޖުރިސްޑިކްޝަންތެރޭ ބެހެއްޓުމަށް ކުރި މުހިންމު މަސައްކަތްތައް ފާހަގަކުރަމުން މަލީހު ވިދާޅުވި ޓެކްނޮލޮޖީ މިނިސްޓަރު ކަމުގައި ހުންނެވި ދުވަސްވަރު މުޅިންއާ ސްޓޭޓް އޮފް ދި އާޓް ޑޭޓާ ސެންޓަރެއް އަޅަން 10 މިލިއަން ޑޮލަރު ސެކިއޯކޮށް ކުރެހުން ނިންމާ ހުށަހެޅުމުން ރައީސް އޮފީހުން އޭރު ކުރީ ރިޖެކްޓް ކަމަށެވެ. އަދި އެންސީއައިޓީގެ ޑީއާރު ސައިޓެއްގެ ގޮތުގައި ފުވައްމުލަކުގައި ހަދަން ފެށި ޑޭޓާ ސެންޓަރު އެބަންޑަންކުރި ކަމަށާއި އަދި ކުޅުދުށްފުށި މަޝްރޫއު ކުރިއަށް ނުގެންދިޔަ ކަމަށް މަލީހު ވިދާޅުވި އެވެ.

"އަޅުގަނޑު ޓެކްނޮލޮޖީ މިނިސްޓަރު ކަމުގައި މުޅިންއާ ސްޓޭޓް އޮފް ދި އާޓް ޑޭޓާ ސެންޓަރެއް އަޅަން 10 މިލިއަން ޑޮލަރު ސެކިއޯކޮށް ކުރެހުން ނިންމާ ހުށަހެޅުމުން ރައީސް އޮފީހުން އޭރު ކުރީ ރިޖެކްޓް. އެންސީއައިޓީގެ ޑީއާރު ސައިޓެއްގެ ގޮތުގައި ފުވައްމުލަކުގައި ހަދަންފެށި ޑޭޓާ ސެންޓަރު އެބަންޑަންކުރި. އަދި ކުޅުދުށްފުށި މަޝްރޫއު ކުރިޔަށް ނުގެންދިޔަ،" މަލީހު ވިދާޅުވި އެވެ.

މަލީހު ވިދާޅުވީ ސަރުކާރުގެ ހިންގުން އަދިވެސް ވަރަށް ބޯދާ ކަމަށާއި ސަރުކާރުގެ ހުރިހާ އިދާރާއަކުން ވެސް އެ ހާދިސާއިން އިބްރަތް ލިބިގަންނާނެ ކަމަށް އުންމީދު ކުރައްވާ ކަމަށެވެ.

ނިމިދިޔަ އެމްޑީޕީ ސަރުކާރުން ހިންގި "ގެދޮރުވެރިޔާ" ސްކީމުން ފްލެޓު ލިބޭނެ ކަމަށް ނެރުނު ލިސްޓް ރައްކާކޮށްފައިވަނީ އެ މިިނިސްޓްރީގެ ކްލައުޑް ހޯސްޓިންގައި ކަމަށްވުމުން، އެ ލިސްޓު ސަލާމަތުން އޮތް ކަމަށާއި އެ މައުލޫމާތަށް އެއްވެސް އަސަރެއް ނުކުރާ ކަމަށް ހައުސިން މިނިސްޓްރީން އިއްޔެ ވަނީ ބުނެފަ އެވެ.

މާލޭ ރައްޔިތުންގެ ރަށްވެހިކަމުގެ ހިދުމަތްތަކާއި އިމާރާތްތަކާ ބެހޭ ބައި ވެސް ހުރީ ރޯވި އިމާރާތުގަ އެވެ. އެހެންވެ، މާލޭ މީހުންގެ ގިނަ ލިޔުންތަކެއް ގެއްލުމުގެ ބިިރު އޮތް ކަމުގެ ކަންބޮޑުވުން މާލޭ ސިޓީ ކައުންސިލްގެ ޑެޕިއުޓީ މޭޔަރު އަހްމަދު ނަރީޝް ވަނީ ފާޅުކުރައްވާފަ އެވެ.

އެގޮތުން ނަރީޝް ވިދާޅުވި ގޮތުގައި 1960 އިން ފެށިގެން އަދި އޭގެ ކުރީގައި ވެސް މާލޭގައި އުފަންވި ހުރިހާ އެންމެންގެ ޑޮކިއުމަންޓުތައް ހުރީ އެތަނުގައިކަމަށާއި އޭގެ ތެރޭގައި ގޭގޭގެ ރަޖިސްޓްރީ އާއި ރަށްވެހިކަމުގެ ރަޖިސްޓްރީ ހިމެނޭކަމަށް ވެސް އޭނާ ވިދާޅުވި އެވެ.