ވޭޕް މަނާކުރާ ގާނޫނުގައި ބަޔާންކޮށްފައިވާ އުސޫލްތަކާ ހިލާފުވެގެން މިދިޔަ ހަފްތާއެއްގެ ތެރޭގައި ނުވަ މީހަކު ޖޫރިމަނާކޮށްފައިވާ ކަމަށް ފުލުހުން ބުނެފި އެވެ.

މިމަހުގެ 15 ވަނަ ދުވަހުން ފެށިގެން ވޭޕްގެ ބާވަތްތައް ބޭނުންކުރުން ގާނޫނީގޮތުން މަނާކޮށްފައިވާއިރު، ފުލުހުން އާންމުކުރި މައުލޫމާތުގައި ވާގޮތުން، ވޭޕް މަނާކޮށްގެން މިދިޔަ ހަފްތާއެއްހާ ދުވަހުގެ ތެރޭގައި ނުވަ މީހަކު ވަނީ ޖޫރިމަނާކޮށްފައި އެވެ. އަދި ކުރެވުނު ޖޫރިމަނާގެ ޖުމްލަ އަދަދު 50،000 ރުފިޔާއަށް އަރާކަމަށް ވެސް ފުލުހުން ބުނެފައިވެ އެވެ.

ފުލުހުން އާންމުކުރި މައުލޫމާތަށް ބަލާއިރު، ޖޫރިނަމާކުރި މީހުންގެ ތެރެއިން އެކަކު ޖޫރިމަނާ ކޮށްފައިވަނީ ސައިކަލް ދުއްވަމުން އީ ސިނގިރޭޓް ބޭނުންކުރުމުންނެވެ. އެމީހާ ޖޫރިމަނާ ކޮށްފައިވަނީ 10،000 ރުފިޔާއިންނެވެ. ދުންފަތް ކޮންޓްރޯލް ކުރުމުގެ ގާނޫނަށް އަލަށް ގެނައި އިސްލާހުން އެބާވަތުގެ އަމަލެއް ކޮށްފިނަމަ ޖޫރިމަނާކުރުމުގެ ބާރު ފުލުހުންނަށް ވެސް ލިބެ އެވެ.

ރާއްޖޭގައި ވޭޕް ބޭނުންކޮށް އެތަކެތީގެ ވިޔަފާރިކުރުން މަނާކޮށް، ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ދުންފަތް ކޮންޓްރޯލް ކުރުމާއި ބެހޭ ގާނޫނަށް ހުށަހެޅި އިސްލާހުގައުވާގޮތުން، އެ ގާނޫނާ ޚިލާފް ވެއްޖެ ބޮޑު ޖޫރިމަނާއެއް ދައްކަންޖެހެ އެވެ.

ވޭޕް ބޭނުންކުރުން މަނާކޮށްފައި ވާއިރު، ވޭޕްގެ ގާނޫނުގައި ވާތުން، ވޭޕާއި ވޭޕް ކުރަން ބޭނުން ކުރާ ތަކެތި ރާއްޖެއަށް އެތެރެ ކޮށްފިނަމަ، އެތެރެ ކުރި މީހަކު 50،000 ރުފިޔާއިން ޖޫރިމަނާ ކުރެވެ އެވެ. އަދި ވޭޕް އެތެރެ ކުރާ ކޮންމެ ވޭޕަކަށް އިތުރު 10،000 ރުފިޔާގެ މަގުން ޖޫރިމަނާކުރާއިރު، ރާއްޖޭގައި ވޭޕް ވިއްކާ ކޮންމެ މީހަކަށް 20،000 ރުފިޔާގެ ޖޫރިމަނާއެއް، އަދި ވިއްކި ކޮންމެ ވޭޕަކަށް 10،000 ރުފިޔާގެ މަގުން ޖޫރިމަނާ ކުރާގޮތަށް ގާނޫނުގައި ވެ އެވެ.

މީގެ އިތުރުން ހިލޭ މީހަކަށް ވޭޕެއް ދީފިނަމަ 10،000 ރުފިޔާގެ ޖޫރިމަނާއެއް ކުރުމާއި ވޭޕް ބޭނުން ކުރާ މީހަކު 5،000 ރުފިޔާއިން ޖޫރިމަނާކުރުން ވެސް ގާނޫގައި ހިމަނާފައިވެ އެވެ.