ފިލަން ޖެހޭ ކަމެއް ކޮށްފައި ނުވާނެކަމަށް ހިޔާނާތުގެ ތުހުމަތުތަކެއް ކުރެވިފައި ވަނިކޮށް އިސްތިއުފާ ދެއްވި ފެނަކަ ކޯޕަރޭޝަންގެ ކުރީގެ މެނޭޖިން ޑިރެކްޓަރު މުއާޒު މުހައްމަދު ރަޝީދު ވިދާޅުވެއްޖެ އެވެ.

މުއާޒު މިއަދު މިހެން ވިދާޅުވީ އޭނާ ރާއްޖެއިން ފިލައިގެން ފުރަނީކަމަށް ބުނެ ސޯޝަލް މީޑިއާގައި ބައެއް ފަރާތްތަކުން ތުހުމަތު ކޮށްފައިވަނިކޮށެވެ.

"މާތްކަލާކޯ! ފިލަން ޖެހޭ ކަމެއް ކޮށްފައެއް ނޯއްނާނެ" މިކަމާއި ގުޅިގެން މުއާޒު ކުރެއްވި އެކްސް ޕޯސްޓުގައި ވިދާޅުވެފައިވެ އެވެ.

މުއާޒު އިތުރަށް ވިދާޅުވީ އާއިލާއާއެކު އިންޑިއާއަށް ފުރަނީ ބޭސްފަރުވާއަށާއި ޗުއްޓީ ހޭދަކޮށްލެއްވުމަށް ކަމަށެވެ. އަދި އެނބުރި ވަރަށް އަވަހަށް އަންނާނެކަމަށްވެސް ވިދާޅުވެފައިވެ އެވެ.

މުއާޒު އިސްތިއުފާ ދެއްވީ މިމަހުގެ 23 ގަ އެވެ. މުއާޒު ފޮނުއްވި އިސްތިއުފާގެ ސިޓީގައި ވަނީ ކުންފުންޏަށް ލިބޭ އާމްދަނީއަށްވުރެ ކުރަންޖެހޭ ހަރަދުތައް ބޮޑުވުމުން ދެމެހެއްޓެނިވި ގޮތެއްގައި ހިދުމަތްތައް ފޯރުކޮށްނުދެވޭ ހާލަތަށް ކުންފުނި ވެއްޓިފައިވާ ކަމަށެވެ. އަދި އޭނާ އެ މަގާމުގައި ހުރެގެން އިތުރަށް އެކަންކަން ރަނގަޅުކުރުމުގެ އަލިމަގެއް ފެންނަން ނެތް ކަމަށް ވެސް އޭނާ ވިދާޅުވެފައިވެ އެވެ.

މުއާޒު މިފަދައިން ވިދާޅުވިއިރު، މި އަހަރު ބޭއްވި ރައްޔިތުންގެ މަޖިލީހުގެ އިންތިހާބާއި އެކި އެކި ބައި އިލެކްޝަންތަކާ ދިމާކޮށް ގިނަ އަދަދެއްގެ މުވައްޒަފުންނަށް އެ ކުންފުނިން ވަޒީފާ ދީފައިވެ އެވެ. އަދި ގިނަ އަދަދެއްގެ މުވައްޒަފުންނަށް އިންތިހާބުތަކާ ދިމާކޮށް ޕްރޮމޯޝަންތައް ވެސް ދީފައިވެ އެވެ.