ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ޑެޕިއުޓީ މެނޭޖިން ޑިރެކްޓަރަކަށް ފަޔާޒް މަންސޫރު އައްޔަންކޮށްފި އެވެ.

އެޗްޑީސީގެ އޮފިޝަލަކު ވިދާޅުވީ ފަޔާޒް މިއަދު އެ ކުންފުނީގެ މުވައްޒަފުންނާ ބައްދަލުކުރައްވާފައިވާ ކަމަށެވެ.

އެޗްޑީސީގެ ޑެޕިއުޓީ މެނޭޖިން ޑިރެކްޓަރުކަން ކުރިން ވެސް ކުރައްވާފައިވާ ފަޔާޒް މަންސޫރަކީ ގެޑޯ ކޮންސަލްޓިންގެ ޑިރެކްޓަރެއްގެ މަގާމު ވެސް އަދާކުރައްވާފައިވާ ބޭފުޅެކެވެ.

އޭނާ އެ މަގާމަށް އައްޔަން ކުރަން އުޅޭ ކަމަށް މިދިޔަ ހަފްތާގައި ސޯޝަލް މީޑިއާގައި ވާހަކަދެވިފައިވެ އެވެ.

ބޭބެއަށް ވަގަށް ގޯތި ދިން މައްސަލަ ފަޅާއެރުމުން އެޗްޑީސީގެ މެނޭޖިން ޑިރެކްޓަރުކަމުން އިބްރާހީމް ފަޒުލް ރަޝީދު އިސްތިއުފާދެއްވުމުން އެ މަގާމަށް އައްޔަން ކުރައްވާފައި ވަނީ މުހައްމަދު މައުރޫފް ޖަމީލެވެ. އޭނާ އަކީ ރައީސް މައުމޫން އަބްދުލްގައްޔޫމްގެ ވެރިކަމުގައި އެ ކުންފުނީގައި މަސައްކަތް ކުރެއްވި ބޭފުޅެކެވެ.

ފަޒުލް އެޗްޑީސީ ހިންގެވިއިރު، ހިންގާފައިވާ ބޮޑެތި ކޮރަޕްޝަންގެ މައްސަލަތަކެއް ސޯޝަލް މީޑިއާގައި ވަނީ ތަފްސީލާއެކު ހާމަކޮށްފަ އެވެ. ނަމަވެސް އެ މައްސަލަތައް ފުލުހުންނާއި އޭސީސީން ތަހުގީގެއް ނުކުރެ އެވެ.