ޕީއެންސީ އަކީ ނިދާފަ ހޭލާއިރު ކޮންމެ މީހަކުވެސް ޖަހައިގެން ގެންގޮސްފާނެ މިނިކާ ބާޒެއް ކަމަށް ކުރީގެ ނައިބު ރައީސް މުހައްމަދު ޖަމީލް ވިދާޅުވެއްޖެ އެވެ.

ޖަމީލު މިއަދު އެކްސްގައި ކުރެއްވި ޕޯސްޓެއްގައި މިހެން ވިދާޅުވީ ޕީއެންސީން ގިނަ ބައެއްގެ ނަމުގައި ވަގު މެންބާޝިޕް ފޯމް ހުށަހަޅައިގެން އެ ޕާޓީއަށް ވައްދާ މައްސަލައަށް އިޝާރާތް ކުރައްވަމުންނެވެ.

ޖަމީލު ވިދާޅުވީ ވަގު ފޯމް ހުށަހަޅައިގެން މީހުން ޕާޓީއަށް ވެއްދުމަކީ މަކަރާ ޙީލަތާ، ފޯޖަރީ އާއި، އަސާސީ ޙައްގުތަކަށް އަރައިގަތުން ހިމެނޭ ޖަރީމާތަކެއް ކަމަށެވެ.

"ދިވެހި އެތަކެއް ރައްޔިތަކަށް ޖެހިފައިވާ މުޞީބާތަކަށް މިޕާޓީ ވެއްޖެ! މިއީ ސީދާ މުއިއްޒު އާއި އިޙްސާން އަދި ޕީއެންސީ ބޮޑުން ޒިއްމާ ނަގަން ޖެހޭކަމެއް" ޖަމީލް ވިދާޅުވި އެވެ.

ޕީއެންސީގެ މިއަމަލުތައް ޖިނާއީ ކުށްތަކެއްގެ ގޮތުގައި ތަޙްގީގު ކުރެވެންޖެހޭ ކަމަށްވެސް އޭނާ ވިދާޅުވި އެވެ.

"މުއިއްޒުގެ ޕާޓީން މިކުރަނީ މުޅިތަން ފަސާދަކުރުން. ވައްކަން އާންމުކުރުން. ނިޒާމު ގަޑުބަޑުކުރުން" ޖަމީލުގެ ޕޯސްޓުގައި ވިދާޅުވެފައިވެ އެވެ.

ޖަމީލު ވިދާޅުވީ މުއިއްޒުގެ ދިވެހިންގެ ރާއްޖޭގައި ރައްޔިތުންގެ މަޖްލީހުގެ އިދިކޮޅު މެމްބަރަކަށްވެސް ރައްކާތެރިކަމެއް ނެތް ކަމަށެވެ. ދެން ޕީއެންސީގެ ނުރައްކަލުން އާންމު މީހާގެ ޙައްގުތައް ރައްކާތެރިކޮށްދޭނީ ކޮންބައެއްތޯ އޭނާ ވަނީ ސުވާލުކުރައްވާފަ އެވެ.

ޕީއެންސީއަށް ވަގު ފޯމު ފުރައިގެން މީހުން ވައްދާ މައްސަލަ ބޮޑުވެފައި ވަނިކޮށް މިއަދު ވަނީ އެމްޑީޕީގެ ވައިކަރަދޫ ދާއިރާގެ މަޖިލިސް މެންބަރު ހުސައިން ޒިޔާދު (ފިއްޓޭ) ވެސް އެ ޕާޓީއަށް ބަދަލުކޮށްފައިވާކަން ފަޅާއަރާފަ އެވެ. މިކަމާއި ގުޅިގެން އިދިކޮޅު އެމްޑީޕީން ވަނީ އެކަން ސީރިއަސް މައްސަލައެއްގެ ގޮތުގައި ބެލުމަށް ގޮވާލާފަ އެވެ.