ސަރުކާރު ހިންގާ ޕީއެންސީން ބައެއް މީހުނަށް ނޭނގި އެމީހުންގެ ނަމުގައި ޕާޓީއަށް ވަނުމަށް ވަގު ފޯމް ހުށަހެޅިކަމަށް އިއުތިރާފު ވެއްޖެ އެވެ.

އެ ޕާޓީން މިކަމަށް އިއުތިރާފުވެފައި ވަނީ މިއަދު އެކަމާއި ގުޅިގެން ނެރުނު ބަޔާނެއްގަ އެވެ.

ޕީއެންސީން ބައެއް ފަރާތްތަކުގެ ނަމުގައި ވަގު ފޯމް ހުށަހަޅާފައިވާ މައްސަލަ ބޮޑުވެ އެކަމުގެ ކަންބޮޑުވުން މީހުން ފާޅުކުރަމުންދަނިކޮށް ނެރުނު ބަޔާނުގައި ބުނީ މެމްބާޝިޕް ޑްރައިވްގައި ޕާޓީއަށް ހުށަހެޅުނު އެތައް ހާސް ފޯމެއް އެ ޕާޓީގެ ފަރާތުން އިލެކްޝަންސް ކޮމިޝަނަށް ހުށަހަޅާފައި ވަނިކޮށް، ސައްހަ ނޫން ފޯމުތަކެއް ހުށަހެޅިފައިވާކަން ޕާޓީއަށް ފާހަގަކުރެވިފައިވާ ކަމަށެވެ.

ޕީއެންސީން ބުނީ ޕާޓީގެ ފަރާތުން ހުށަހަޅާ ފޯމުތަކުގެ ސައްހަކަން ވެރިފައި ކުރެވޭނެ އެއްވެސް ގޮތެއް އެ ޕާޓީއަށް ލިބިފައި ނެތް ކަމަށެވެ.

އިލެކްޝަން ކޮމިޝަންގެ މައްސަލައެއް ކަމަށް ދޭހަވާގޮތަށް ޕީއެންސީން ބަޔާން ނެރެފައިވީނަމަވެސް ސިޔާސީ ޕާޓީތަކުން ފޯމް ހުށަހަޅާއިރު، އެ ފޯމުގެ ޒިންމާ ނަގަން ޖެހޭނީ ޕާޓީން ކަމަށް ބުނެފައި އޮވެ އެވެ. އަދި އެކަމަށް އިގުރާރުވެ ޕާޓީގެ ވެރިއަކު ސޮއި ކުރަންވެސް ޖެހެ އެވެ.

މިދިޔަ އަހަރުގެ ފަހުކޮޅު ޕީއެންސީއަށް މެންބަރުން އިތުރު ކުރުމަށް އެ ޕާޓީން ފަށާފައިވާ ހަރަކާތުގައި ގިނަ އަދަދެއްގެ ބަޔަކު ޕާޓީއާ ގުޅުނުކަމަށް ޕީއެންސީން ބުންޏެވެ. އެގޮތުން އެ ޕާޓީގެ ޗެއާޕާސަން އަބްދުއް ރަހީމް އަބްދުﷲ ވިދާޅުވެފައިވަނީ ޕީއެންސީއަށް 100،000 އަށްވުރެ ގިނަ މީހުން ސޮއި ކޮށްފައިވާ ކަމަށެވެ.

ވަގު ފޯމްގެ އެތައް މައްސަލައެއް ފެންމަތިވެފައި ވަނިކޮށް އިއްޔެގެ ވަގުތެއްގައި ރައްޔިތުންގެ މަޖިލީހުގެ ވައިކަރަދޫ ދާއިރާގެ އެމްޑީޕީ މެންބަރު ހުސެން ޒިޔާދު (ފިއްޓޭ)ވެސް ވަގަށް ޕީއެންސީއަށް ވައްދާފައިވާކަން ވަނީ ހާމަވެފަ އެވެ.

ޕީއެންސީގެ ވަގު ފޯމްތައް ހެކިކޮށްފައި ހުރީ އެ ޕާޓީއަށް ނިސްބަތްވާ ބައެއް މަޖިލިސް މެންބަރުންނާއި ސިޔާސީ މަގާމުތަކުގައި ތިއްބެވި ފަރާތްތަކެވެ. އޭގެ ތެރޭގައި ޑީއެންއާރްގެ ވެރިޔާވެސް ހިމެނެ އެވެ.

ޕީއެންސީއަށް ފޯމް ފުރި ދުވަސްވަރު، ޑީއެންއާރް ތެރޭގައި ލިސްޓްތަކެއް ބަލައިގެން ޕާޓީގެ ފޯމް ފުރަން ބަޔަކު ތިބޭ ފޮޓޯ ތަކެއްވެސް ވަނީ އާއްމުވެފަ އެވެ.