ކުރިއަށް އޮތް ތިން ދުވަހު ވެސް ރާއްޖޭގެ އެކި ހިސާބުތަކަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާއިން ލަފާކޮށްފި އެވެ.

އެ އިދާރާއިން ބުނީ ދެކުނުގެ ރަށްތަކަށް މިއަދު ވެސް މޫސުން ގޯސްވާނެ ކަމަށެވެ. އެގޮތުން ދެކުނާއި މެދު ރާއްޖެތެރޭގެ ރަށްތަކަށް ވިއްސާރަކޮށް ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެންވާ އުތުރުގެ ރަށްތަކަށް ވެސް ކެރީގެ އަސަރުފޯރާނެ ކަމަށް މޫސުމާ ބެހޭ އިދާރާއިން ބުނެ އެވެ.

ވޭތުވެދިޔަ 24 ގަޑިއިރު ވެސް އެންމެ ގިނައިން ވާރޭ ވެހިފައި ވަނީ ސ. ގަމަށެވެ. އެއީ 43.1 މިލިމީޓަރުގެ ވާރެ އެވެ.

މޫސުމާ ބެހޭ އިދާރާއިން ބުނީ ރާއްޖޭގެ ކަނޑުތައް އާދައިގެވަރަކަށް މަޑުވެފައި ވިލާގަނޑުގައި އާދައިގެ ވަރަކަށް ގަދަވާނެ ކަމަށެވެ. އަދި އުތުރާއި އިރުއުތުރުން ގަޑިއަކު 5 މޭލާއި 15 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާ ކަމަށް ލަފާކުރެވޭ ކަމަށް އެ އިދާރާއިން ބުނެ އެވެ.

ރާއްޖެއަށް މިހާރު ކުރަމުންދާ ވިއްސާރައަކީ ސްރީލަންކާގެ އިރު ދެކުނުގައި އުފެދިފައިވާ ސާކިއުލޭޝަނެއްގެ ސަބަބުން ކުރަމުންދާ ވިއްސާރައެއް ކަމަށް މޫސުމާ ބެހޭ އިދާރާއިން ބުނެ އެވެ. މި ވިއްސާރަ އަލިވާނެކަމަށް ލަފާކުރެވެނީ އަންނަ ހޮނިހިރުދުވަހު ކަމަށް ވެސް އެ އިދާރާއިން ބުނެ އެވެ.