އެމެރިކާގެ ލޮސް އެންޖެލިސްގައި މިހާތަނަށް ހިނގި އެންމެ ގެއްލުންބޮޑު އަލިފާނުގެ ހާދިސާއަށް މާގިނަ ދުވަހެއް ނުވެ އަނެއްކާވެސް އަލިފާން ފެތުރެން ފަށައިފި އެވެ.

ބުދަ ދުވަހުގެ މެންދުރުފަހު، ލޮސް އެންޖެލިސް ސިޓީގެ އުތުރު-ހުޅަނގުން 45 މޭލު ދުރުގައިވާ، ރަށްވެހި ސަރަޙައްދުތަކާއި ސްކޫލްތަކާ އިންވެގެންވާ ފަރުބަދަ ސަރަޙައްދެއްގައިވާ ކަސްޓައިކް ލޭކް ކައިރީގައި ވަނީ އަލިފާން ރޯވެފަ އެވެ.

ގަދަ ވަޔާއި ހިކިފައިވާ ގަސްތަކުގެ ސަބަބުން ކޮންޓްރޯލް ނުކުރެވި ފެތުރެމުންދާ ލޮސް އެންޖެލެސްގެ އަލިފާން 9،400 އޭކަރަށްވުރެ ބޮޑު ސަރަޙައްދަކަށް ފެތުރިފައިވެ އެވެ. މިހާތަނަށް އެއްވެސް ގެއަކަށް ނުވަތަ ވިޔަފާރިއަކަށް ގެއްލުމެއް ލިބިފައެއް ނުވެ އެވެ. ނަމަވެސް 31،000 އާބާދީއެއް ވަނީ ރައްކާތެރި ހިސާބުތަކަށް ދަތުރުކުރަން ފަށާފަ އެވެ. އަދި މެކްސިކޯއިން ކެނެޑާއަށް އެމެރިކާގެ ހެ ހުޅަނގު ފަރާތު އައްސޭރިއާ ހަމައަށް ދަތުރުކުރެވޭ މައި މަގު ކަމުގައިވާ އިންޓާސްޓޭޓް 5 ވަނީ ބަންދުކޮށްފަ އެވެ.

މިފަހަރު އަލިފާން ފެތުރެމުން މިދަނީ މި މަހުގެ ކުރީކޮޅު ލޮސް އެންޖެލެސް ގެ ބޮޑު ސަރަހައްދެއް އަނދާ އަޅިއަށް ހަދާލި ދެ ބޮޑު އަލިފާނުގެ ހާދިސާ ހިނގި ހިސާބުގެ އުތުރުގަ އެވެ. އެ ދެ ހާދިސާގެ އަލިފާން އަދިވެސް ދަނީ ރޯވަމުންނެވެ.މި ސަރަޙައްދުގައި ވައި ޖެހެމުންދަނީ ގަޑިއަކު 20 އިން 30 މޭލުގެ ބާރުމިނުގަ އެވެ. ނަމަވެސް ކުރިއަށް އޮތް ދުވަސްތަކުގައި ވައި އިތުރަށް ގަދަވާނެކަމަށް ވަނީ ލަފާކޮށްފަ އެވެ. މިކަމުގެ ސަބަބުން އަލިފާން އިތުރަށް ފެތުރުމަށް މަގުފަހިވެ، މަތިން އަލިފާން ނިއްވުމުގެ މަސައްކަތް ކުރުމަށް ދަތިތަކެއް ކުރިމަތިވާނެ ކަމަށް އަލިފާން ނިއްވާ ފަރާތްތަކުން ބުނެ އެވެ.

ލޮސް އެންޖެލިސް ކައުންޓީގެ ޝެރިފް ރޮބަޓް ލޫނާ ވިދާޅުވި ގޮތުގައި މި ސަރަޙައްދުގެ 31،000 މީހުން ސަރަހައްދު ދޫކޮށް ދިއުމަށް އަންގާފައިވާއިރު، މި ސަރަޙައްދުގައިވާ ޖަލެއްގައި ތިބި 500 އަށްވުރެ ގިނަ ޤައިދީން އިވެކުއޭޓްކުރަމުންދާ ކަމަށްވެސް އޭނާ ވިދާޅުވި އެވެ.