އަމިއްލަ ހަރަދުގައި ރާއްޖޭގެ 57 ރަށެއްގައި ހައުސިން ޔުނިޓްތައް އަޅައިދޭނެ ބަޔަކު ހޯދަން ސަރުކާރުން އިއުލާންކޮށްފި އެވެ.

ފިނޭންސް މިނިސްޓްރީން ކުރި އިއުލާނެއްގައި ވަނީ އެ މަޝްރޫއު ކުރިއަށް ގެންދަން ކުރިމަތިލެވޭނީ ރާއްޖޭގެ ކުންފުނިތަކަށާއި ރާއްޖެއިން ބޭރުގެ ކުންފުނިތަކުގެ އިތުރުން ރާއްޖެ އާއި ބޭރުގެ ކުންފުނިތަކުން އެކުވެ އުފައްދާފައިވާ ޖޮއިންޓް ވެންޗާ ކުންފުނިތަކަށް ކަމަށެވެ.

އިއުލާނުގައިވާގޮތުން އެ މަސައްކަތް ކުރަންޖެހެނީ ކޮންޓްރެކްޓާ ފައިނޭންސިންގެ އުސޫލުންނެވެ. މި އުސޫލަކީ ކުންފުނިތަކުން އެ ކުންފުނީގެ އަމިއްލަ ހަރަދުގައި ހައުސިން ޔުނިޓްތައް އަޅައިދޭ އުސޫލެވެ. ސަރުކާރުން ފައިސާ ދައްކާނީ މަސައްކަތް ނިންމުމުންނެވެ.

ފިނޭންސް މިނިސްޓްރީން އިއުލާންކުރީ 12.000އަށްވުރެ ގިނަ ހައުސިން ޔުނިޓްތައް އަޅާނެ ބަޔަކު ހޯދުމަށެވެ.

މި މަޝްރޫއުގައި ހިމެނޭ ކެޓަގަރީތައް

ކެޓަގަރީ 1: 50 ހައުސިން ޔުނިޓު ނުވަތަ އެއަށް ވުރެ މަދުން ހައުސިން އިމާރާތް އަޅާ ރަށްތައް

ކެޓަގަރީ 2: 51 އިން ފެށިގެން 150 ހައުސިން ޔުނިޓާ ދެމެދުގެ އިމާރާތްތައް އަޅާ ރަށްތައް

ކެޓަގަރީ 3: 200 އިން ފެށިގެން 250 ހައުސިން ޔުނިޓާ ދެމެދުގެ އިމާރާތްތައް އަޅާ ރަށްތައް

ކެޓަގަރީ 4: 300 ނުވަތަ އެއަށް ވުރެ ގިނަ ހައުސިން ޔުނިޓު އަޅާ ރަށްތައް

ރައީސް ޑރ. މުހައްމަދު މުއިއްޒު ވިދާޅުވެފައި ވަނީ މި އަހަރުގެ ބަޖެޓަކީ ބޯހިޔާވަހިކަމުގެ ބަޖެޓެއް ކަމަށެވެ. އެކަމަކު މަސައްކަތް ހަވާލުކުރަން އުޅެނީ އަމިއްލަ ހަރަދުގައި ހައުސިން ޔުނިޓްތައް އެޅުމަށެވެ. އޭގެމާނައަކީ ސަރުކާރުގައި އެކަންކުރެވޭ ވަރަށް ފައިސާ ނެތުމެވެ. އެހެންގޮތަކަށް ބުނާނަމަ މިއީ ކޮންމެ މަހަކު ވަކިވަރެއް ދައްކައި ހަލާސްކުރާ އުސޫލުން ބޭންކުން ލޯނު ނެގުން ފަދަ ކަމެކެވެ.

ފާއިތުވި އަހަރުތަކުގައި ރާއްޖޭގެ ކޮންސްޓްރަކްޝަން ކުންފުނިތަކަށް ސަރުކާރުން ދޭންޖެހޭ ފައިސާ ނުދިނުމުގެ ސަބަބުން އެ ކުންފުނިތައް ވަނީ ވަރަށް ބޮޑަށް އިނދަޖެހިފައެވެ. އެ ކުންފުނިތަކަށް ފައިސާ ދޭން ފެށީ ދާދިފަހުންނެވެ. އެހެންކަމުން އަމިއްލަ ހަރަދުގައި ހައުސިން ޔުނިޓްތައް އެޅުމުގެ ގާބިލުކަން ދިވެހި ކުންފުނިތަކުގައި ހުންނާނެ ކަމާ މެދު ސުވާލު އުފެދެއެވެ.