މިއަދާއި މާދަމާ އުތުރާއި މެދުރާއްޖެތެރެއަށް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ މެޓް އޮފީހުން ލަފާކޮށްފި އެވެ.
މޫސުން ގޯސްވާނެކަމަށް ލަފާކޮށް މެޓުން ވަނީ މި އަތޮޅުތަކަށް ވައިޓް އެލާޓް ނެރެފަ އެވެ.
މެޓް އޮފީހުން ނެރުނު ވައިޓް އެލާޓްގައި ބުނެފައިވަނީ ހއ އަތޮޅުން ފެށިގެން ބ އަތޮޅާއި ހަމައަށް މިއަދު ހެނދުނު 07:00 އިން މެންދުރުފަހު 01:00 އާ ހަމައަށް ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައި ޖެހޭނެ ކަމަށެވެ. އަދި ވިލާގަނޑުގައި ގަޑިއަކު 40 މޭލަށް ވައި ގަދަވެ ކަނޑުތައް ގަދަވާނެ ކަމަށްވެސް އެ އިދާރާއިން ލަފާކުރެ އެވެ.
ކުރިއަށް އޮތް 24 ގަޑިއިރު އެންމެ ދެކުނުގެ އަތޮޅުތަކަށް ކެރީގެ އަސަރު ކުރާނެ ކަމަށާއި، އެހެން ހިސާބުތަކަށް ވިއްސާރަވެ ގުގުރުން އެކަށީގެންވާ ކަމަށް މެޓުން ބުނެފައިވެ އެވެ. މިރޭން ފެށިގެން މެދުރާއްޖެތެރެއާއި އުތުރަށް ބޯކޮށް ވާރޭވެހިދާނެ ކަމަށްވެސް އެ އިދާރާއިން ލަފާކުރެ އެވެ.
މެޓުގެ ރިކޯޑުތަކުން ދައްކާ ގޮތުގައި ފާއިތުވި 24 ގަޑިއިރުގެ ތެރޭގައި އެންމެ ގިނައިން ވާރޭވެހިފައިވަނީ ކ. ދިއްފުއްޓަށެވެ. އެރަށަށް 10.9 މިލިމީޓަރުގެ ވާރޭ ވެހިފައިވެ އެވެ.
ކަނޑުތައް ގަދަވާނެކަމަށް ލަފާކޮށް، ކަނޑު ދަތުރުފަތުރުކުރާ ފަރާތްތަކުން ސަމާލުވުމަށް މެޓް އޮފީހުން ވަނީ އިލްތިމާސްކޮށްފަ އެވެ.