ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިހާބުގައި މައްސަލަ ދިމާވެގެންނާއި، ވޯޓު އެއްވަރުވެގެން 12 ދާއިރާއެއްގައި އަލުން ވޯޓުލުން ބާއްވަންޖެހޭ ކަމަށް އިލެކްޝަންސް ކޮމިޝަން (އީސީ) ން ބުނެފި އެވެ.

އީސީގެ ރައީސް އަހުމަދު ޝަރީފު ދައުލަތުގެ މީޑިއާ (ޕީއެސްއެމް)އަށް މައުލޫމާތު ދެއްވަމުން ވިދާޅުވީ، އިންތިހާބާއި ގުޅިގެން ހުށަހެޅުނު ހުރިހާ މައްސަަލަތަކާއި ޝަކުވާތައް ބަލައި ނިމި ދާއިމީ ނަތީޖާ މިހާރު އިއުލާން ކުރެވިފައިވާ ކަމަށެވެ.

އިންތިހާބުގައި ވޯޓަށް އަސަރުކުރާ ފަދަ މައްސަލަތަކެއް ދިމާވެގެން އަލުން އިންތިހާބު ބާއްވަންޖެހޭ ކަމަށް ކަނޑައަޅާފައި ވަނީ ތ. ގާދިއްފުއްޓާއި، ލ.މާވަށުގަ އެވެ.

މީގެ އިތުރުން މައްސަލަ ދިމާވެގެން ދެ ދާއިރާއެއްގައި އަލުން ވޯޓުލާން ނިންމާފައިވާއިރު، ހަތަރު ދާއިރާއެއްގެ ވޯޓުގެ ނަތީޖާ އެއްވަރު ވުމުން އެ ދާއިރާތަކުގައި ވެސް އިންތިހާބު އަލުން ބާއްވާނެ ކަމަށެވެ. އެ ދާއިރާތަކަކީ ހއ. ތަކަންދޫ، ފ. ދަރަނބޫދޫ، މ. ރަތްމަންދޫ، އަދި ބ. ކިހާދޫ އެވެ. މީގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ އިންތިހާބުގެ ނަތީޖާ އެއްވަރުގެން ހަ ދާއިރާއެއްގައި ވޯޓުލުން ބޭއްވުމަށް ވަނީ ހަމަޖެހިފަ އެވެ. އެ ދާއިރާތަކުގައި އިންތިހާބު ބާއްވާނެ ވަކިތާރީހެއް އީސީ އިން ނިންމާފައިނުވާ ކަމަށް ޝަރީފު ވަނީ ވިދާޅުވެފަ އެވެ.

އޭނާ ވިދާޅުވީ، އީސީން މިހާރު މަސައްކަތް ކުރަމުންދަނީ އިންތިހާބުގައި ވާދަކުރުމަށް ކަނޑައެޅި އަދަދަށް ކުރިމަތިލާފައިނުވާ ދާއިރާތަކުގައި އަލުން ވޯޓުލުމުގެ ކަންކަން ބޭއްވުމަށް ކަމަށެވެ. އެކަމުގައި އީސީގެ ބައްދަލުވުމެއް ބާއްވައި އެ ދާއިރާތަކަށް އަލުން ހުޅުވާލާނެ ދުވަހަކާއި އިންތިހާބު ބާއްވާނެ ދުވަހެއް އިއުލާނު ކުރާނެ ކަމަށް ޝަރީފް ވިދާޅުވި އެވެ.