ކައުންސިލް އިންތިހާބުގެ ކެންޑިޑެސީ ހުށަހެޅޭ ވަގުތު އިތުރުކޮށްފި

ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އިތުރު 10 ދުވަސް ދިނުމަށް އިދިކޮޅު އެމްޑީޕީން މިއަދު ގޮވާލައިފައި ވަނިކޮށް، އިލެކްޝަންްސް ކޮމިޝަން (އީސީ)ން ފޯމު ހުށަހެޅޭނޭ ގަޑިތައް އިތުރުކޮށްފި އެވެ.

ކައުންސިލް އިންތިހާބުގައި ވާދަކުރަން ފޯމު ހުށަހަޅަން މިމަހުގެ 17 އިން އަންނަ މަހުގެ ފުރަތަމަ ދުވަހާ ހަމައަށް ހުޅުވާލިއިރު ހުކުރު ދުވަސް ފިޔަވައި އެހެން ދުވަސްތަކުގައި ފޯމް ހުށަހެޅުމުގެ ވަގުތަކީ ހެނދުނު 8:30 އިން މެންދުރު ފަހު 3:30 އަށެވެ. އަދި ހުކުރު ދުވަހު މެންދުރުފަހު 3:30 އިން 5:30 އަށެވެ.

އީސީން ސަރުކާރުގެ ގެޒެޓުގައި މިއަދު އާންމުކޮށްފައިވާ އިއުލާނެއްގައި ވަނީ، ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބަށް ކުރިމަތިލުމަށް އެދޭ ފަރާތްތަކުގެ ފޯމު އޮންލައިންކޮށް ކޮންމެ ދުވަހަކު ހުށަހެޅޭނެ ވަގުތު ދެ ގަޑިއިރަށް އިތުރުކޮށްފައިވާ ކަމަށެވެ.

އެހެންކަމުން، މިއަދުން ފެށިގެން އަންނަ އާދިއްތަ ދުވަހުގެ ނިޔަލަށް، ހުކުރު ދުވަސް ފިޔަވައި ކޮންމެ ދުވަހަކު ހެނދުނު 8:30 އިން ހަވީރު 5:30 އަށް އަދި ހުކުރު ދުވަހު މެންދުރުފަހު 3:30 އިން ރޭގަނޑު 8:00 އަށް، ފޯމު ހުށަހެޅޭނެ ގަޑިތައް އިތުރުކޮށްފައިވާ ކަމަށް އެ ކޮމިޝަނުން ބުނެ އެވެ.

އަންނަ އޭޕްރިލް މަހުގެ ހަތަރު ވަނަ ދުވަހު އޮންނަ ކައުންސިލް އިންތިޚާބުތަކުގައި ވާދަކުރަން ހުޅުވާލީ މިމަހު 17 ވަނަ ދުވަހެވެ. އެ މުއްދަތު ހަމަވާން މީގެ ކުރިން އޮތީ، އަންނަ އާދިއްތަ ދުވަހުގެ މެންދުރުފަހު 3:30 އަށެވެ.

އެމްޑީޕީން ވަނީ، އީސީން އިންތިހާބަށް ކުރިމަތިލާން ދީފައި ވަނީ ވަރަށް ކުޑަ މުއްދަތެއް ކަމަށާއި، ވަކިން ޚާއްސަކޮށް އޮންލައިންކޮށް ހުށަހެޅުމަށް ޖާގަ ދީފައި އޮތުމަކީ، ގިނަ ކެންޑިޑޭޓުންތަކެއްގެ އިންތިޚާބީ ހައްގު ނިގުޅައިގަނެވޭނެ ކަމެއް ކަމަށް ބުނެފަ އެވެ.

މީގެ އިތުރުން އެމްޑީޕީން ވަނީ މި ސަރުކާރުން އިންތިޚާބަށް ނުފޫޒު ފޯރުވަން މަސައްކަތް ކުރާ ކަމަށާއި، އީސީގެ ޕޯޓަލަށް ވެރިކަން ކުރާ ޕާޓީއަށް ވަދެވި، އޭގައި ހުރި މައުލޫމާތު ބެލޭ ކަމަށް ތުހުމަތުކޮށްފަ އެވެ. ނަމަވެސް އީސީން މީގެ ކުރިން ވަނީ އެ ތުހުމަތުތައް ދޮގުކޮށްފަ އެވެ.