އީރާނުން ދިން ހަމަލާތަކާ ގުޅިގެން، ގަތަރުގެ ދައުލަތުގެ ހަކަތައާ ބެހޭ ކުންފުނިން ގުދުރަތީ ދިޔާގޭސް (އެލް.އެން.ޖީ) އުފެއްދުން ހުއްޓާލިކަން އިއުލާނުކުރުމާއެކު، ވިލާތުގެ ބާޒާރުގައި ގޭހުގެ އަގު ވަރަށް ބޮޑަށް އުފުލިއްޖެ އެވެ.

މީގެ އިތުރުން، ސައުދީ އަރަބިއްޔާގެ އިރުމަތީ ސަރަހައްދުގައި ހުންނަ ރައުސް ތަނޫރާ ތެޔޮ ސާފުކުރާ ކާރުޚާނާއަށް ޑްރޯން ހަމަލާއެއްދީ އަލިފާން ރޯވުމާ ގުޅިގެން، އެ ތަނުގެ ބައެއް ޔުނިޓުތަކުގެ މަސައްކަތް ވަގުތީ ގޮތުން ހުއްޓާލާފައިވާ ކަމަށް އެ ގައުމުން ވަނީ ބުނެފަ އެވެ.

ދުނިޔޭގައި އެންމެ ފުޅާދާއިރާއެއްގައި އެލް.އެން.ޖީ އުފައްދާ ކުންފުނި ކަމަށްވާ ގަތަރު އެނާޖީން މިއަދު ނެރުނު ބަޔާނެއްގައި ބުނެފައިވަނީ، ގަތަރުގެ ރައުސް ލައްފާން އިންޑަސްޓްރިއަލް ސިޓީއާއި މެސައީދު އިންޑަސްޓްރިއަލް ސިޓީގައި ހުރި އެ ކުންފުނީގެ މަރުކަޒުތަކަށް އީރާނުން ދިން އަސްކަރީ ހަމަލާތަކުގެ ސަބަބުން، އެލް.އެން.ޖީ އާއި އެއާ ގުޅުންހުރި އުފެއްދުންތައް އުފެއްދުން މެދުކަނޑާލާފައިވާ ކަމަށެވެ. މި އިއުލާނާއެކު، ވިލާތުގެ ބާޒާރުގައި ގުދުރަތީ ގޭހުގެ އަގު ގާތްގަނޑަކަށް 50 އިންސައްތަ އުފުލިގެން ދިޔައެވެ.

ގަތަރުގެ ދިފާއީ ވުޒާރާއިން މީގެ ކުރިން ހާމަކުރި ގޮތުގައި، އީރާނުން ފޮނުވާލި ދެ ޑްރޯން ހަމަލާއެއް އެ ގައުމަށް ވަނީ އަމާޒުވެފަ އެވެ. މީގެ ތެރެއިން އެއް ޑްރޯން މެސައީދުގައި ހުންނަ ކަރަންޓު އުފައްދާ މަރުކަޒެއްގެ ފެން ޓޭންކަކަށް އަމާޒުވިއިރު، އަނެއް ޑްރޯން އަމާޒުވީ ރައުސް ލައްފާންގައި ހުންނަ ގަތަރު އެނާޖީގެ މަރުކަޒަކަށެވެ. މި ހަމަލާތަކުގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް އެ ވުޒާރާއިން ބުނެ އެވެ.

ސައުދީ އަރަބިއްޔާގެ ރަސްމީ ނިއުސް އެޖެންސީ އެސްޕީއޭ އިން ރިޕޯޓުކޮށްފައިވާ ގޮތުގައި، ހޯމަ ދުވަހުގެ ހެނދުނު ރައުސް ތަނޫރާ ތެޔޮ ސާފުކުރާ ކާރުޚާނާއަށް ދޭން އުޅުނު ދެ ޑްރޯން ހަމަލާއެއް ދިފާއީ ބާރުތަކުން ހުއްޓުވާފައިވާ ކަމަށާއި، އޭގެ ސަބަބުން ކުޑަ އަލިފާނުގެ ހާދިސާއެއް ހިނގި ކަމަށެވެ. އަލްޖަޒީރާއިން ކަށަވަރުކޮށްފައިވާ ވީޑިއޯތަކުން ފެންނަ ގޮތުގައި ސައުދީގެ އައްސޭރިފަށުގައި ހުރި އެ ތެޔޮ މަރުކަޒުން ބޯ ދުންތައް އަރަމުންދިޔަ އެވެ. ސައުދީ ދިފާއީ ވުޒާރާއިން ބުނީ އެ ތަނަށް ލިބުނީ ކުޑަ ގެއްލުމެއް ކަމަށާއި، އެއްވެސް މީހަކަށް ގެއްލުމެއް ލިބިފައިނުވާ ކަމަށެވެ.

ދުނިޔޭގެ އެންމެ ބޮޑު ތެޔޮ ސާފުކުރާ މަރުކަޒުތަކުގެ ތެރޭގައި ހިމެނޭ ރައުސް ތަނޫރާއަކީ ދުވާލަކު 550,000 ފީފާ ތެޔޮ ސާފުކުރުމުގެ ގާބިލުކަން ލިބިފައިވާ ތަނެކެވެ. މިއީ މެދުއިރުމަތީގެ ހަކަތައިގެ ދާއިރާގެ މައިބަދަ ކަމަށް ބެލެވޭ މުހިންމު ބިނާއެކެވެ.

މި ހަމަލާތައް ދީފައިވަނީ ދުނިޔޭގެ ކަނޑުމަގުން ކުރާ ތެޔޮ ވިޔަފާރީގެ ފަސްބައިކުޅަ އެއްބަޔާއި ގަތަރުގެ ގިނަ އަދަދެއްގެ ގޭސް އުފުލާ ހޯމުޒް ކަނޑުއޮޅީގެ ދެފަރާތުގައި ތެޔޮ ޓޭންކަރުތައް ތޮއްޖެހިފައިވާ ދަނޑިވަޅެއްގަ އެވެ. ކަނޑުމަގުގެ ދަތުރުފަތުރަށް ހުރަސްއެޅި، ހަނގުރާމަ ދިގުލައިގެން ހިނގައިދާނެ ކަމުގެ ބިރު އުފެދުމާއެކު ދުނިޔޭގެ ބާޒާރުގައި ތެޔޮ އަގު ވަނީ ވަރަށް ބޮޑަށް އުފުލިފަ އެވެ. މީގެ ސަބަބުން ދުނިޔޭގެ އިގްތިސާދަށް ބޮޑެތި ނޭދެވޭ އަސަރުތަކެއް ކުރާނެ ކަމަށް ބެލެ ވެއެވެ.

އީރާނުން މި ހަމަލާތައް ދެމުންދަނީ، އެމެރިކާ އާއި އިޒްރޭލުން އެ ގައުމަށް ދިން ވަރުގަދަ ވައިގެ ހަމަލާތަކުގެ ބަދަލުހިފުމެއްގެ ގޮތުން، މެދުއިރުމަތީގައި ހުރި އިޒްރޭލާއި އެމެރިކާގެ އަސްކަރީ މަރުކަޒުތަކަށް އަމާޒުކޮށްގެންނެވެ.

ސައުދީ ހަކަތައާ ބެހޭ ވުޒާރާއިން ބުނީ، ރައްކާތެރިކަމުގެ ފިޔަވަޅެއްގެ ގޮތުން ބައެއް މަސައްކަތްތައް ހުއްޓާލާފައިވީ ނަމަވެސް، އެ ގައުމުގެ އެތެރޭގެ ބާޒާރަށް ތެޔޮ ފޯރުކޮށްދިނުމަށް އެއްވެސް ބުރޫއެއް ނާރާނެ ކަމަށެވެ.

އީރާނުގެ ހަމަލާތަކާ ގުޅިގެން އެމެރިކާ، ބަހްރެއިން، އުރުދުން، ކުވައިތު، ގަތަރު، ސައުދީ އަރަބިއްޔާ އަދި ޔޫ.އޭ.އީ އިން ވަނީ ގުޅިފައިވާ ބަޔާނެއް ނެރެ، އީރާނުގެ އަމަލުތައް ކުށްވެރިކޮށް، އަމިއްލަ ނަފްސުގެ ދިފާއުގައި ފިޔަވަޅު އެޅުމުގެ ހައްގު އެ ގައުމުތަކަށް ލިބިގެންވާކަން ހާމަކޮށްފަ އެވެ.