އީރާނާއެކު އޮތް މަސްރަހު އިތުރަށް ގޯސްވެ، މުޅި ސަރަހައްދު ބޮޑު ހަނގުރާމައެއްގެ ތެރެއަށް ވެއްޓިދާނެ ފަދަ އެއްވެސް ފިޔަވަޅެއް ނޭޅުމަށް ސައުދީ އަރަބިއްޔާއިން ގަލްފުގެ ބައިވެރި ގައުމުތަކަށް އަންގައިފި އެވެ.

އެމެރިކާ އާއި އިޒްރޭލުން އީރާނަށް ދިން ހަމަލާތަކުގެ މިންވަރާއި އެ ހަމަލާތައް ދިން ވަގުތާ މެދު ސައުދީގެ އިސް އޮފިޝަލުން ވަނީ ނުރުހުން ފާޅުކުރައްވާފަ އެވެ. އަދި އެ ހަމަލާތައް ވަގުތުން ހުއްޓާލުމަށް ވެސް ވަނީ ގޮވާލާފަ އެވެ.

ގަލްފުގެ ސޯސްތަކާ ހަވާލާދީ "މިޑްލް އީސްޓް އައި" އިން ބުނީ ސައުދީ ވަލީއަހުދު މުހައްމަދު ބިން ސަލްމާން މި މެސެޖު ބަހުރޭން، ކުވެއިތު، ގަތަރު އަދި ޔޫއޭއީގެ ވެރިންނަށް އެރުވީ މިދިޔަ ހޮނިހިރު ދުވަހު އެވެ. މި މަޝްވަރާތައް ކުރިއަށް ދިޔައީ އީރާނުން އަރަބި ކަނޑުގެ ސަރަހައްދަށް ދިން ރައްދު ހަމަލާތައް ސައުދީ ހާރިޖީ ވުޒާރާއިން ކުށްވެރިކުރިތާ ކުޑަ ވަގުތުކޮޅެއްގެ ތެރޭގަ އެވެ.

އޭނާ ބުނެފައިވާ ގޮތުގައި، އީރާނުގެ ރައްދު ހަމަލާތަކަކީ އުންމީދުކުރި ވަރަށް ވުރެ ބާރު ދަށް ހަމަލާތަކެއް ކަމަށް ގަލްފުގެ ގައުމުތަކުން ގަބޫލުކުރެ އެވެ. އެހެންކަމުން، ތެހެރާނުގެ ނުރުހުން އަމާޒުވެދާނެ ފަދަ އެއްވެސް ސީދާ ފިޔަވަޅެއް އެޅުމުން ދުރުހެލިވުމަށް އެ ގައުމުތަކުން ވަނީ އެއްބަސްވެފަ އެވެ.

ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރްހާން ބިން އަބްދުﷲ ވެސް ވަނީ ސަރަހައްދީ ގައުމުތަކުގެ ފޮރިން މިނިސްޓަރުންނާ ފޯނުން ގުޅުއްވައި މި ވިސްނުން ތަކުރާރު ކުރައްވާފަ އެވެ.

މި މަޝްވަރާތަކުގެ މައިގަނޑު ބޭނުމަކީ މަސްރަހު ފިނިކުރުމާއި، ގަލްފް ކޯޕަރޭޝަން ކައުންސިލް (ޖީސީސީ) ގެ ހަ ގައުމުގެ ހާރިޖީ ސިޔާސަތު އެއްގޮތްކޮށް، އެއްވެސް ގައުމަކުން ވަކިން ފިޔަވަޅެއް އެޅިޔަނުދިނުމެވެ. ހާއްސަކޮށް، ޔަމަނާއި ސޫދާނުގެ ހަނގުރާމައާ ގުޅިގެން ހިޔާލުތަފާތުވުން ތަކެއް އުފެދިފައިވާ ވަލީއަހުދު ބިން ސަލްމާން އާއި ޔޫއޭއީގެ ރައީސް މުހައްމަދު ބިން ޒައިދުއާ ދެމެދު ކުރެވުނު ފޯނު ކޯލަކީ، އީރާނުގެ ހަމަލާތަކުގެ ސަބަބުން މުޅި ސަރަހައްދަށް ލިބުނު ސިހުން ހާމަކޮށްދޭ ކަމެއް ކަމަށް މަސްދަރުތަކުން ބުނެ އެވެ.

އެމެރިކާ އާއި އިޒްރޭލުން އީރތާނަށް ހަމަލާ ދިނުމުގެ ކުރިން ރިޔާޟަށް އެކަން އެންގި ނަމަވެސް، ސައުދީން ނިންމީ ވައިޓް ހައުސްގެ ނިންމުމާ ދެކޮޅަށް ނުދިއުމަށެވެ. ނަމަވެސް، ހަމަލާ ނުދިނުމަށް އެދި ސަރަހައްދީ ބައިވެރިން ކުރި އާދޭސްތަކަށް އެމެރިކާއިން ބީރު ކަންފަތެއް ދީފައިވާ ކަމަށް އެއް މަސްދަރަކުން ވަނީ ބުނެފަ އެވެ.

އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އީރާނާ ދެކޮޅަށް ކުރަމުންދާ ހަނގުރާމައިގެ ކެމްޕޭން ވަރުގަދަކޮށްފައިވާ މި ދަނޑިވަޅުގައި، ގަލްފުގެ ގައުމުތަކުން މިހާރު މަސައްކަތް ކުރަމުންދަނީ އީރާނާއެކު ސީދާ ހަނގުރާމައަކަށް މަގުފަހިވެދާނެ އެންމެހާ ކަންކަމުން ދުރުހެލިވެ، ސަރަހައްދީ ހަމަޖެހުން ގާއިމުކުރުމަށެވެ.