އިޒްރޭލްގެ ރައްޔިތުންގެ ތެރެއިން ފުރާނަ ސަލާމަތްވާން ބޭނުންވާ މީހުން ވަގުތުން އެ ގައުމު ދޫކޮށް ދިއުމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން އިންޒާރު ދީފި އެވެ.

އައިއާރުޖީސީން ބުނި ގޮތުގައި ކުރިއަށް އޮތީ ވަރަށް ވަރުގަދަ އަދި ފަނާކުރަނިވި ހަނގުރާމައެކެވެ.

އައިއާރުޖީސީ އިން ނެރުނު ބަޔާނެއްގައި ބުނީ އިޒްރޭލްގެ އަސްކަރީ މަރުކަޒުތަކާއި، ސަރުކާރުގެ އިދާރާތަކާއި، ސަލާމަތީ މަރުކަޒުތަކާ ދުރަށް ދިއުމަށް އެ ގައުމުގައި ދިރިއުޅޭ މީހުންނަށް އިލްތިމާސްކުރާ ކަމަށެވެ. އަދި މި ހަނގުރާމައިގެ ނަތީޖާ ވަރަށް ބިރުވެރިވާނެ ކަމަށާއި، މިކަން ނިމިގެންދާނީ އިޒްރޭލް އެއްކޮށް ސުންނާފަތިވުމުން ކަމަށް ވެސް އެ ބަޔާނުގައި ބުނެފައިވެ އެވެ.

"އަޅުގަނޑުމެން އިރުޝާދު ދެނީ އިޒްރޭލްގެ ސަރަހައްދުތަކުގައި ދިރިއުޅޭ މީހުން އަސްކަރީ މަރުކަޒުތަކާއި، ސަލާމަތީ އަދި ސަރުކާރުގެ މަރުކަޒުތަކާ ދުރަށް ދިއުމަށާއި، ވަގުތުން އެ ސަރަހައްދުތައް ދޫކޮށް ދިއުމަށް،" އައިއާރުޖީސީގެ ބަޔާނުގައި ބަޔާންކޮށްފައިވެ އެވެ.

އައިއާރުޖީސީން އިތުރަށް ބުނެފައި ވަނީ އެ ޖަމާއަތުން ފޮނުވާލި "ޚައިބަރު" މިސައިލްތަކުން ތަލް އަވީވްގައި ހުރި ސަރުކާރުގެ އިމާރާތްތަކަށާއި، ހައިފާ އަދި އިރުމަތީ ގުދުސްގައި ހުރި އަސްކަރީ އަދި ސަލާމަތީ މަރުކަޒުތަކަށް އަމާޒުކޮށްފައިވާ ކަމަށެވެ. އަދި އިޒްރޭލްގައި ގުގުމަމުންދާ އިންޒާރުގެ ރަނގަބީލުތަކުގެ އަޑު ދެން ދުވަހަކު ވެސް ކެނޑިގެން ނުދާނެ ކަމަށް ވެސް އެ ބަޔާނުގައި ބުނެފައިވެ އެވެ.

މި ހަނގުރާމައަށް އީރާނުން ފުރިހަމައަށް ތައްޔާރުވެފައިވާ ކަމަށާއި، މިއީ އިޒްރޭލަށް ކުރިމަތިވާނެ އެންމެ ނުރައްކާތެރި ދަނޑިވަޅު ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ.