ފަލަބަލި ނުވަތަ ބަރުދަން އިތުރުވުމަކީ ހަމައެކަނި ހަށިގަނޑުގެ ބޭރުފުށުގެ ސިފައަށް އަންނަ ބަދަލެއް ނޫނެވެ. މިއީ ހިތުގެ ސިއްހަތަށް ސީދާ ނޭދެވޭ އަސަރުކޮށް، ހިތުގެ އުމުރު އަވަހަށް ދުވަސްވުމަށް މަގުފަހި ކުރުވާ މުހިންމު ސަބަބެކެވެ.

ސިއްހީ މާހިރުންނާއި ކާޑިއޮލޮޖިސްޓުން ވިދާޅުވާ ގޮތުގައި، ޒުވާން އުމުރުގައި ހިތް ހުއްޓުމާއި ސްޓްރޯކް ޖެހުން އިތުރު ވަމުންދާ އެންމެ ބޮޑު އެއް ސަބަބަކީ ފަލަ ބައްޔެވެ.

ފަލަބަލިން ހިތަށް ކުރާ ނޭދެވޭ އަސަރުތައް

  • ލޭގެ ހިނގުމަށް ކުރާ ބާރު: ހަށިގަނޑުގައި މަސްތަކާއި ފެޓް ޓިޝޫތައް އިތުރު ވުމުން، މުޅި ހަށިގަނޑަށް ލޭ ފޮނުވައި ދިނުމަށްޓަކައި ހިތަށް ކުރަންޖެހޭ މަސައްކަތް ދެގުނައަށް އިތުރުވެ އެވެ. މީގެ ސަބަބުން ހިތުގެ މަސްތައް ބޯވެ، ހިތް ބަލިކަށިވާން ފަށަ އެވެ.
  • ލޭ މައްޗަށް ދިއުމާއި އިންފްލެމޭޝަން: ފަލަބަލީގެ ސަބަބުން ހަށިގަނޑުގެ ތެރޭގައި ދާއިމީ އިންފްލެމޭޝަން (ދުޅަވުން) އުފެދި، ލޭ ނާރުތައް ހިމަވެ ހަރުވެ އެވެ. މިއީ ލޭ މައްޗަށް ދިއުމަށް މެދުވެރިވާ މައިގަނޑު ސަބަބެކެވެ.
  • ޒުވާން އުމުރުގައި ސްޓްރޯކް ޖެހުން: ލޭ ނާރުތަކުގައި ސަރުބީ ޖަމާވެ، ލޭ ދައުރު ކުރުމަށް ހުރަސް އެޅުމުގެ ސަބަބުން، ކުރިން ދުވަސްވީ މީހުންނަށް އެކަނި މެދުވެރިވާ ސްޓްރޯކް ފަދަ ނުރައްކާތައް މިހާރު ޒުވާނުންނަށް މެދުވެރިވާ މިންވަރު ވަނީ ވަރަށް ބޮޑަށް އިތުރުވެފަ އެވެ.
  • މެޓަބޮލިކް ސިންޑްރޯމް: ފަލަ ބައްޔާއެކު ހަކުރު ބަލި އަދި ކޮލެސްޓްރޯލް މައްޗަށް ދިއުން ފަދަ މައްސަލަތައް އެކުއެކީގައި މެދުވެރި ވުމުން، ހިތުގެ އުމުރު ހަށިގަނޑުގެ އަސްލު އުމުރަށްވުރެ މާ އަވަހަށް ދުވަސް ވުމަށް މަގުފަހިވެ އެވެ.

ރައްކާތެރިވުމަށް ކުރެވިދާނެ ކަންކަން

  1. ސިއްހަތަށް ފައިދާހުރި ކާނާ: ތެޔޮ ގިނަ، މީރުކުރި ކާނާއާއި ސީނީގެ ބަދަލުގައި މޭވާއާއި ކޫރު ހުންނަ ކާނާ ބޭނުން ކުރުން.
  2. ގަވާއިދުން ކަސްރަތުކުރުން: ދުވާލަކު މަދުވެގެން 30 މިނެޓު ހިނގުން ނުވަތަ ކަސްރަތު ކުރުން.
  3. ބަރުދަން ކޮންޓްރޯލް ކުރުން: ހަށިގަނޑުގެ ބީއެމްއައި އެކަށީގެންވާ މިންވަރެއްގައި ހިފެހެއްޓުން.
  4. ގަވާއިދުން މެޑިކަލް ޗެކްއަޕް ހެދުން: ލޭގެ ގްލޫކޯޒް، ކޮލެސްޓްރޯލް އަދި ލޭގެ ޕްރެޝަރު ގަވާއިދުން ބެލުން.