ދާރުއްސަލާމް (11 މެއި)- އިޒްރޭލުގެ ސިފައިންނާއި ފަލަސްތީނުގެ ހަމާސް ޖަމާއަތާ ދެމެދު ކުރިއަށްދާ ކުރިމަތިލުންތަކުގައި އިޒްރޭލުގެ ހަމަލާތައް ވަރުގަދަ ކުރާނެ ކަމުގެ އިންޒާރު އެ ގައުމުގެ ބޮޑުވަޒީރު ބެންޖަމިން ނަތަންޔާހޫ ދެއްވައިފި އެވެ.

އޭނާ މި އިންޒާރު ދެއްވާފައިވަނީ ހަމާސް ޖަމާއަތުން ފޮނުވާލި ރޮކެޓް ހަމަލާއެއްގައި އިޒްރޭލުގެ ދެ އަންހެނަކު މަރުވުމާ ގުޅިގެންނެވެ.

ހަމާސް އާ ދެކޮޅަށް އިއްޔެއިން ފެށިގެން ސަތޭކަ އަށްވުރެ ގިނަ ރޮކެޓް ހަމަލާތައް ފޮނުވާފައިވާނެ ކަމަށާއި ކުރިއަށް އޮތް ތަނުގައި އެހަމަލާތަކުގެ ބާރުގަދަ ކުރާނެ ކަމަށް ނަތަންޔާހޫގެ އޮފީހުން ނެރުނު ވީޑިއޯ މެސެޖެއްގައި ބޮޑުވަޒީރު ވިދާޅުވި އެވެ.

އަންގާރަ ދުވަހު ހަމާސް އިން ބުނެފައި ވަނީ އެ ޖަމާއަތުން ފަސް މިނެޓު ތެރޭގައި 137 ރޮކެޓް ހަމަލާ އިޒްރޭލަށް އަމާޒުކޮށް ފޮނުވާފައި ވާނެ ކަމަށެވެ.

ނަތަންޔާހޫ އިތުރަށް ވިދާޅުވީ ހަމާސްގެ އިސް ބައެއް އޮފިސަރުން މަރާލާފައިވާނެ ކަމަށާއި ހަމާސް އިން އަމާން ނުދީފިނަމަ އެ ޖަމާއަތުން ހީވެސް ނުކުރާފަދަ ހަމަލާއެއް އައިސްދާނެ ކަމަށެވެ.-- އަލް އަރަބިއްޔާ