ރަސްމާލެއިން 500 ހެކްޓަރުގެ ބިން އީގަލް ހިލްސް ކުންފުންޏަށް ދޭން ނިންމި ނިންމުމާ ގުޅޭގޮތުން ސަރުކާރުން ހާމަނުކޮށް ހުރި މައުލޫމާތުތައް ސާފުކޮށްދޭން އެދި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ޕީޕަލްސް ނޭޝަނަލް ފްރަންޓް (ޕީއެންއެފް) އިން ސިޓީއެއް ފޮނުވައިފި އެވެ.

ޕީއެންއެފުން ފޮނުވި ސިޓީގައި ބުނެފައި ވަނީ ރަސްމާލެ ޑީލްގައި ގޮތް ނޭނގޭ އެތައް ކަމެއް ހުރި ކަމަށާއި، އެ މުއާމަލާތުގެ ސަބަބުން ދިވެހި ރައްޔިތުންނަށާއި ދައުލަތުގެ މިނިވަންކަމާއި އިސްތިގުލާލަށް ނުރައްކާވެދާނެ ކަމަށް ބެލެވޭތީ، މައުލޫމާތު ސާފުކުރުމަށް 34 ސުވާލެއް ހުށަހަޅާފައިވާނެ ކަމަށެވެ.

އެ ސިޓީގައި ސާފުކުރަން އެދިފައިވާ މުހިންމު ކަންތައްތަކުގެ ތެރޭގައި، ރަސްމާލޭގެ ބިމުން އީގަލް ހިލްސްއަށް ދޭ ބިމުގެ އަގާއި، އެ ބިން ކުއްޔަށް ދިނުމުގެ ކުރިން ގާނޫނުއަސާސީއާއި ގާނޫނުތަކަށް ގެންނަންޖެހޭ ބަދަލުތަކުގެ ތަފްސީލު ހިމެނެ އެވެ.

މީގެ އިތުރުން އެ ބިން ހިއްކައި ރިވެޓްމެންޓް ޖެހުމަށް ސަރުކާރުން ކުރި ހަރަދުގެ މިންވަރާއި، 99 އަހަރަށް ބިން ދޭން ނިންމާފައިވާ ގޮތުގެ މާނަކުރުމުގެ އިތުރުން، އެ މަޝްރޫއު އީގަލް ހިލްސްއާ ހަވާލުކުރި އުސޫލާއި، އެ ބިމުން އެއްވެސް މިންވަރެއް އެހެން ބަޔަކަށް މިލްކުކޮށްދެވިދާނެތޯ ވެސް ވަނީ ސުވާލުކޮށްފަ އެވެ.

އީގަލް ހިލްސްއަށް ރަސްމާލެ ދިނުމުގެ އެގްރީމެންޓުގައި ސޮއިކޮށްފައި ވަނީ މިދިޔަ ހަފްތާގެ ހޯމަ ދުވަހު އެވެ.

އެ އެގްރީމެންޓުގެ ތަފްސީލު ހާމަނުކޮށް ސަރުކާރުން ބުނަމުންދަނީ އެތަން ދިނީ ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލޭ 99 އަހަރަށް ކަމަށެވެ.

މި މުއާމަލާތާ ގުޅިގެން ސަރުކާރަށް ބޮޑެތި ފާޑުކިޔުންތަކެއް އަމާޒުވެފައިވީ ނަމަވެސް، ސަރުކާރުން ބުނަމުންދަނީ މިއީ އާންމު އުސޫލުން ރިސޯޓުތައް ދޭ ގޮތަށް ދީފައިވާ ތަނެއް ކަމަށާއި، މި އިންވެސްޓްމަންޓުގެ ސަބަބުން ރާއްޖެއަށް ނުދެކޭ ވަރުގެ ބޮޑު އާމްދަނީއެއް ލިބިގެންދާނެ ކަމަށެވެ.