އިސްލާމް އާބާދު (03 އޭޕްރީލް) - ޕާކިސްތާނުގެ ދާޚިލީ މަސްރަހު ހޫނުވެ، އެ ގައުމުގެ ގާނޫނު ހަދާ މަޖިލިސް އުވާލައިފި އެވެ.

ޕާކިސްތާނުގެ ގާނޫނު ހަދާ މަޖިލިސް އުވާލައިފައި މިވަނީ އެގައުމުގެ ބޮޑުވަޒީރު އިމްރާން ޚާންގެ އިތުބާރު ނެތްކަމުގެ ވޯޓެއް ނަގަން މިއަދު މަޖިލީހުގައި ތާވަލު ކޮށްފައި ވަނިކޮށެވެ.

ވޯޓު ނެގުމުގެ ކުރިން އެ ގައުމުގެ ރައީސް ޑރ. އާރިފް އަލްވީ ގާނޫނު ހަދާ މަޖިލިސް އުވާލެއްވީ ބޮޑުވަޒީރު އިމްރާން ޚާންގެ ދެންނެވުމުގެ މަތިން ކަމަށް ރިޕޯޓުތައް ބުނެ އެވެ.

މިކަމާ ގުޅޭގޮތުން އިމްރާން ވިދާޅުވީ ގާނޫނު ހަދާ މަޖިލީހަށް ބޭރުގެ ނުފޫޒު ފޯރުވާފައިވާ ކަމަށާއި ވީހާ ވެސް އަވަހަށް އެ ގައުމުގައި އިންތިހާބު ބާއްވަން ޖެހޭ ކަމަށެވެ.

ޕާކިސްތާނުގައި މިހާތަނަށް ބޮޑުވަޒީރުކަން ކުރެއްވި އެއްވެސް ބޭފުޅަކު ފަސް އަހަރުގެ ދައުރު ފުރިހަމަ ކޮށްފައި ނުވާއިރު މިއަދު ބާއްވަން ހަމަޖެހިފައި އޮތް އިތުބާރު ނެތް ކަމުގެ ވޯޓު ކުރިއަށް ގެންދެވުނު ނަމަ ބޮޑު އަޣުލަބިއްޔަތަކުން އިމްރާނަށް ވެސް ނާކާމިޔާބާ ކުރިމަތިލައްވަން ޖެހިވަޑައިގަންނަވާނެ ކަަމަށް އޮތީ ބެލެވިފަ އެވެ.

މަޖިލިސް އުވާލުމާއެކު ގާނޫނީ ހުސްކަމެއްގެ ތެރެއަށް ޕާކިސްތާނުގެ މަޝްރަހު ވެއްޓިފައިވާއިރު ކުރިއަށް އޮތް 90 ދުވަސް ތެރޭ އިންތިހާބެއް ބާއްވަން ރާވަމުން ދާކަމަށް ރިޕޯޓުތައް ބުނެ އެވެ. -- އަލްޖަޒީރާ