އިންޑިއާގެ ކޮލްކަޓާގައި އޮތް ޝޯއެއްގައި ލަވަ ހުށަހަޅައިދިންތާ އިރުކޮޅެއް ފަހުން ބޮލީވުޑްގެ މަޝްހޫރު ލަވަކިޔުންތެރިޔާ ކޭކޭ މަރުވެއްޖެ އެވެ.

މީޑިއާ ރިޕޯޓްތައް ބުނާގޮތުގައި ކްރިސްނާކުމާރު ކައްނަތު (ކޭކޭ) މަރުވެފައިވަނީ ކޮލްކަޓާގައި ބޭއްވި ޝޯއެއްގައި ލަވަކިޔާ ނިންމާފައި ފޭބުމަށްފަހު ކުއްލިއަކަށެވެ. ކޭކޭ ކުއްލިއަކަށް ވެއްޓުމުން ވަގުތު އޭނާ ހޮސްޕިޓަލަށް ގެންދިޔަ އެވެ. އެހެންނަމަވެސް ހޮސްޕިޓަލަށް ގެންދިޔައިރުވެސް އޭނާ ވަނީ މަރުވެފަ އެވެ. ޑޮކްޓަރުންނާއި ހަވާލާދީ މީޑިއާ ރިޕޯޓްތައް ބުނާ ގޮތުގައި ކޭކޭ މަރުވީ ހާޓް އެޓޭކް ޖެހިގެންނެވެ.

ކޭކޭ މަރުވިއިރު އޭނާގެ އުމުރަކީ 53 އަހަރެވެ.

ކޭކޭ އަކީ ވަރަށް މަގުބޫލު ހިންދީ ލަވަތަކެއް ކިޔާފައިވާ ފަންނާނެ ކެވެ. އަދި ހިންދީ ބަހުގެ އިތުރުން ތަމަޅަ ބަހުންނާއި ބެންގާލީ ބަހުންނާއި ތެލަގޫ ބަހުންވެސް އޭނާ ވަނީ ލަވަ ކިޔާފަ އެވެ.

https://www.youtube.com/watch?v=X6EkmntyCa4

ބޮލީވުޑްގެ ގިނަ ފިލްމުތަކަށް ލަވަކިޔާފައިވާ ކޭކޭ މަރުވުމާއި ގުޅިގެން އޭނާގެ ސަޕޯޓަރުންނާއި ބޮލީވުޑްގެ ތަރިން ވެސް ދަނީ ހިތާމަފާޅުކުރަމުންނެވެ.

ކޭކޭ ކިޔާފައިވާ ބައެއް މަޝްހޫރު ލަވަތަކުގެ ތެރޭގައި ގޭންގްސްޓާއަށް ކިޔައިދީފައިވާ ތުހިމެރި ޝަބްހޭ، އޯމް ޝާތީ އޯމްއަށް ކިޔައިދީފައިވާ އާންކޮންމެ ތެރީ، ޖަންނަތު ފިލްމަށް ކިޔައިދީފައިވާ ޒާރަ ސަ ދިލްމޭ ދޭ ޖަގާ އަދި ތުމް މިލޭއަށް ކިޔައިދީފައިވާ ދިލް އިބާދަތް އާއި ބަޗްނާ އޭ ހަސީނޯއަށް ކިޔައިދީފައިވާ ހުދާ ޖާނޭ ފަދަ ލަވަތައް ހިމެނެ އެވެ.