ބޮލީވުޑްގެ ތަރިން ކަމަށްވާ އަލީ ފަޒަލް އާއި ރިޗާ ޗައްދާގެ ކައިވެނި ހަފްލާއަށް މޯބައިލް ފޯނު ވެއްދޭނެ ކަމަށް އެ ފަންނާނުން ހާމަކޮށްފި އެވެ.

ފަޒަލް އާއި ރިޗާ މިގޮތަށް ހާމަކޮށް، އެމީހުންގެ ކައިވެނި ހަފްލާގެ ދައުވަތު ކާޑުގައި ވަނީ ކައިވެނީގެ ހަފްލާއަށް އަންނަ މެހުމާނުނަށް ފޯނު ބޭނުން ކުރުމުގެ ފުރުސަތު ލިބިގެންދާނެ ކަމަށް ބުނެފަ އެވެ.

ކައިވެނީގެ ރަސްމިއްޔާތުތަކަށް ދާ މީހުން ފޯނު ބޭނުންކޮށް ފޮޓޯ ނަގާ ހެދުން ހުއްދަ އޮތް ނަމަވެސް ވީހާވެސް މަދުން ކުރުމަށް އެދިފައިވެ އެވެ. އެއީ ކައިވެނީގެ ރަސްމިއްޔާތުތަކަށް ސަމާލުކަން ދިނުމާއި އެންމެންގެ ބައިވެރިވުން އިތުރު ކުރުމަށެވެ.

މި ފަހުން ބޮލީވުޑް ތަރިން ބާއްވާ ކައިވެނި ހަފްލާތަކަށް ފޯނު ވެއްދުން ނުވަތަ ފޯނުން ކެމެރާކޮށް ވީޑިއޯ ކުރުން އޮންނަނީ މަނާކޮށްފަ އެވެ. އެފަދަ ކައިވެނި ހަފްލާތައް ބޭއްވި ތަރިންގެ ތެރޭގައި ކެޓްރީނާ ކެއިފް އާއި ވިކީ ކައުޝަން، ރަންބީރު ކަޕޫރާއި އާލިއާ ބަޓް، ޕްރިޔަންކާ ޗޯޕްރާ އާއި ނިކް ޖޯނަސް، ދީޕިކާ ޕަދުކޯން އާއި ރަންވީރު ސިންގ އަދި ވަރުން ދަވަން އާއި ނަތާޝާ ދަލާލް ހިމެނެ އެވެ.

ފަޒަލް އާއި ރިޗާ ކައިވެނި ކުރާ ދުވަސް ކައިރި ވަމުން އަންނަ އިރު ކައިވެންޏަށް ދެތަރިން ވެސް ދަނީ ވަރަށް ބޮޑަށް ތައްޔާރު ވަމުންނެވެ. އަދި މިހާރު އެންމެ ފަހުގެ ތައްޔާރީ ތަކުގެ ތެރޭގައި ހިމެނޭ ކައިވެނި ދައުވަތު ކާޑުވެސް ނިމި މިހާރު ހުރީ ބެހުމަށް ތައްޔާރަށެވެ.

އެމީހުންގެ ފުރަތަމަ ކައިވެނީގެ ރަސްމިއްޔާތުގެ ރިސެޕްޝަން އޮކްޓޯބަރު މަހުގެ ދެވަނަ ދުވަހު ދިއްލީގައި ބޭއްވުމަށް ހަމަޖެހިފައިވާއިރު ދެވަނަ ރިސެޕްޝަން އޮކްޓޯބަރު މަހުގެ ހަތް ވަނަ ދުވަހު މުމްބާއީގައި ބޭއްވުމަށް ވަނީ ނިންމާފަ އެވެ.

ހަތް އަހަރުގެ ދިގު މުއްދަތެއްގައި ރައްޓެހިވެގެން އުޅުނު އަލީ އާއި ރިޗާ ދިމާވީ 2012 ވަނަ އަހަރު، "ފުކްރޭ"ގެ ސެޓުންނެވެ.

2020 ވަނަ އަހަރުވެސް ކައިވެންޏަށް ތައްޔާރުވަމުން ދިއަ ދެތަރިން އެ އަހަރުގައި ކައިވެނި ނުކުރީ ކޮވިޑް ޕެންޑަމިކްގެ ސަބަބުންނެވެ. އޭގެ ފަހުން މިދެތަރިން ކައިވެނި ދެފަހަރެއްގެ މަތިން ލަސްވި ނަމަވެސް އިތުރަށް ލަސް ނުކުރާނެ ކަމަށް ރިޕޯޓްތައް ބުނެ އެވެ.

ރިޗާ، 35، ބުނި ގޮތުގައި އަލީ، 35، ކައިވެންޏަށް ޕްރޮޕޯޒްކުރީ ދެ މީހުން އެކުގައި 2018 ގެ ތެރޭގައި ރާއްޖެއަށް ކުރި ޗުއްޓީ ދަތުރުގެ ތެރޭގަ އެވެ.