ބޭސްފަރުވާގެ ޚިދުމަތް ފޯރުކޮށްދޭ އަމިއްލަ ތަންތަނަށް އާސަންދައިން މިދިޔަ އަހަރު އަމިއްލަ ހޮސްޕިޓަލްތަކަށް 365 މިލިއަން ރުފިޔާ ހޭދަކޮށްފި އެވެ.

އާސަންދައިގެ މިދިޔަ 10 އަހަރުގެ ތަފާސްހިސާބުތައް ދައްކާގޮތުން، ބޭސްފަރުވާގެ ޚިދުމަތް ފޯރުކޮށްދޭ އަމިއްލަ ތަންތަނަށް އާސަންދައިން އެންމެ ގިނައިން ޚަރަދުކޮށްފައިވަނީ ނިމުނު 2022 ވަނަ އަހަރެވެ. އެގޮތުން އެ އަހަރު 1.1 ބިލިއަން ރުފިޔާ ޚަރަދުކޮށްފައިވާއިރު، 2021 ވަނަ އަހަރު 959 މިލިއަން ރުފިޔާ ޚަރަދުކޮށްފައިވެ އެވެ. އަދި 2020 ވަނަ އަހަރު ޚަރަދުކޮށްފައި ވަނީ 739 މިލިއަން ރުފިޔާ އެވެ.

މިދިޔަ އަހަރުތެރޭ އާސަންދައިން އަމިއްލަ ތަންތަނަށް ކުރި ޚަރަދުގެ ތެރެއިން އެންމެ ބޮޑު ހޭދައެއްކޮށްފައިވަނީ ބޭސް ފިހާރަތަކަށެވެ. ދެވަނައަށް އެންމެ ބޮޑު ހޭދައެއްކޮށްފައި ވަނީ ހޮސްޕިޓަލްތަކަށެވެ. މާލެ ސަރަހައްދުގައި ސަރަހައްދުގައި ހިންގަނީ އަމިއްލަ ދެ ހޮސްޕިޓަލެކެވެ. އެއީ އޭޑީކޭ ހޮސްޕިޓަލާއި ޓްރީ ޓޮޕް ހޮސްޕިޓަލެވެ.

މިދިޔަ އަހަރު އާސަންދައިން އަމިއްލަ ތަންތަނަށް ކުރި ޚަރަދު:

  • އަމިއްލަ ބޭސް ފިހާރަތަކަށް – 593 މިލިއަން ރުފިޔާ
  • ހޮސްޕިޓަލްތަކަށް – 365 މިލިއަން ރުފިޔާ
  • ކްލިނިކްތަކަށް – 113 މިލިއަން ރުފިޔާ
  • ލޮލުގެ ފަރުވާދޭ ތަންތަނަށް – 38 މިލިއަން ރުފިޔާ
  • އާޓިފިޝަލް ގުނަވަންތަކަށް – 6 މިލިއަން ރުފިޔާ

ތަފާސްހިސާބުތައް ދައްކާގޮތުން މިދިޔަ 10 އަހަރުތެރޭ އާސަންދައިން އަމިއްލަ ބޭސްފަރުވާދޭ ތަންތަނަށް 6 ބިލިއަން ރުފިޔާ ޚަރަދުކޮށްފައިވެ އެވެ. މީގެ ތެރެއިން އެންމެ ބޮޑު ޚަރަދެއްކޮށްފައި ވަނީ ބޭސް ފިހާރަތަކަށެވެ.

10 އަހަރުތެރޭ އާސަންދައިން އަމިއްލަ ބޭސްފަރުވާދޭ ތަންތަނަށްކޮށްފައިވާ ޚަރަދު:

  • ބޭސް ފިހާރަތައް – 3.4 ބިލިއަން ރުފިޔާ
  • ހޮސްޕިޓަލްތަކަށް – 1.8 ބިލިއަން ރުފިޔާ
  • ކްލިނިކްތަކަށް – 616 މިލިއަން ރުފިޔާ
  • ލޮލުގެ ފަރުވާދޭ ތަންތަނަށް – 298 މިލިއަން ރުފިޔާ
  • އާޓިފިޝަލް ގުނަވަންތަކަށް – 60 މިލިއަން ރުފިޔާ