80ގެ އަހަރުތަކުގައި ބޮލީވުޑްގެ ފިލްމުތަކުން ބެލުންތެރިންގެ މަގުބޫލުކަން ހޯދި ނީތޫ ކަޕޫރު އޭނާގެ ކާރު ކަލެކްޝަންއަށް އާ ކާރެއް އިތުރު ކޮށްފި އެވެ.

ނީތޫ މިފަހަރު ގަތީ މާސިޑީސް މޭބެޗް ޖީއެލްއެސް 600 މޮޑެލްގެ ކާރެކެވެ. މުމްބާއީގައި މިފަހުން އޭނާ ދައްކާލި އާ ކާރުގެ އަގަކީ 2.92 ކުރޯޑް ރުޕީސް އެވެ.

މުމްބާއީގައި މާސިޑީޒް ބެންޒް ވިއްކާ ކުންފުނިން ވެސް ވަނީ ނީތޫ ގަތް ކާރާއެކު ފޮޓޯތަކެއް އާއްމުކޮށްފަ އެވެ. އެ ފޮޓޯތަކުގައި ނީތޫ އޭނާގެ އާ ކާރުގެ ކުރިމަތީގައި ހުއްޓިގެން ހުންނަތަން ފެނެ އެވެ.

ނީތޫގެ އިތުރުން ވެސް ހަމަ މޮޑެލްގެ ކާރުތަކއް ބޮލީވުޑްގެ އެހެން ގިނަ ތަރިން ވެސް ގެންގުޅެ އެވެ. އޭގެ ތެރޭގައި ރަންވީރު ސިންގް، އަރްޖުން ކަޕޫރް އަދި އަޔުޝްމާން ޚުރާނާ ހިމެނެ އެވެ.

ނުވަ އަހަރަށްފަހު ނީތޫ ފިލްމުތަކަށް އެނބުރި އައިސްފައިވާއިރު އޭނާ އެންމެ ފަހުން ފެނިގެން ގޮސްފައިވަނީ އަނިލް ކަޕޫރް، ވަރުން ދަވަން އަދި ކިއާރާ އަދްވާނީއާއެކު ޖުގުޖުގު ޖީޔޯއިންނެވެ.

އެއީ ފިރިމީހާ ރިޝީ ކަޕޫރު މަރުވުމަށްފަހު އޭނާ ކުޅުނު ފުރަތަމަ ފިލްމެވެ.