ފިރިމީހާ އާދިލް ޚާންގެ ކައިރިން ވަރި ނުވާނެ ކަމަށް ބުނިތާ މަސް ދުވަސް ނުވަނީސް ބޮލީވުޑް އަދި ޓީވީ ތަރި ރާކީ ސާވަންތު ވަރިއަށް އެދެފި އެވެ.

މިއަހަރު ކުރީކޮޅު އާދިލްއާ ކައިވެނި ކުރުމަށްފަހު ރާކީ ވަނީ އިސްލާމްދީން ވެސް ގަބޫލުކޮށްފަ އެވެ. އެހެން ނަމަވެސް މާ ގިނަ ދުވަސްތަކެއް ނުވެ އެ ކައިވެނީގައި މައްސަލަ ޖެހެން ވަނީ ފަށާފަ އެވެ.

އެގޮތުން ކައިވެންޏަށް ދެ ހަފްތާ ނުވަނީސް ރާކީ ވަނީ އާދިލްއާ ދެކޮޅަށް ގެވެށި އަނިޔާގެ މައްސަލައަކާއި އޭނާގެ ފައިސާއަށް ޚިޔާނާތްތެރިވުމުގެ މައްސަލައެއް ރިޕޯޓުކޮށްފަ އެވެ.

އާދިލްގެ މައްޗަށް މައިސޫރުގެ ދަރިވަރަކު ވެސް ވަނީ ޖިންސީ ފުރައްސާރައިގެ މައްސަލައެއް ހުށައަޅާފަ އެވެ.

އޭގެ ފަހުން ވައިރަލްވި ވީޑިއޯއެއްގައި އާދިލް ކައިރިން ވަރިނުވާނެ ކަމަށް ރާކީ ބުނި ނަމަވެސް މިފަހުން މީޑިއާއަށް ދިން އިންޓަވިއުއެއްގައި އޭނާ ބުނެފައިވަނީ މިހާރު މިނިވަންވާން ބޭނުންވާ ކަމަށެވެ.

"އޭނަ ބޭނުންވާ މީހަކާ އޭނަ ކައިވެނި ކުރަންވީ. އަހަރެން މިހާރު ބޭނުންވަނީ މިނިވަންވާން" ރާކީ ބުންޏެވެ.

ކުރިން ހިންދޫ ދީނަށް އުޅުނު ރާކީ ރޯދަ މަހު އުމްރާއަށް ދާން ބޭނުން ކަމަށް ބުނެފައިވެ އެވެ.