އިޖުތިމާއީ ފިލްމުތައް ކުޅުމަށް ހާއްސަ އިސްކަމެއް ދެމުން އަންނަ ކަމަށް ނުވަދިހައިގެ އަހަރުތަކުގައި ބޮލީވުޑްގައި އެންމެ މަޝްހޫރުވެގެން ދިޔަ އެއް ބަތަލާ ރަވީނާ ޓަންޑަން ބުނެފި އެވެ.

ރަވީނާ މިއަހަރު ވަނީ އިންޑިއާ ސަރުކާރުން ހަތަރުވަނައަށް ދޭ އެންމެ ޝަރަފުވެރި އެވޯޑު ކަމަށްވާ، "ޕަދްމާޝްރީ އެވޯޑް" ލިބިގެން ގޮސްފަ އެވެ.

ފިލްމީ ދާއިރާގައި 30 އަހަރު ހޭދަކޮށްފައިވާ ބަތަލާ ރަވީނާ ބުނީ އަބަދުވެސް ބަލަނީ ވަރުގަދަ އަންހެން ކެރެކްޓަރު ހިމެނޭ އިޖުތިމާއި ފިލްމުތައް ކުޅުމަށް ކަމަށެވެ.

"އަހަރެން ކޮށްފައިވަނީ އިޖުތިމާއީ ގުޅުން ހުރި ފިލްމުތަކެއް، އަދި އަންހެނުން ބާރުވެރިކުރުމުގެ މެސެޖެއް ވެސް ހުރި ފިލްމުތަކެއް. އަހަރެންގެ އިޚްތިޔާރުތައް އަބަދުވެސް ހުންނަނީ އެގޮތަށް" ރަވީނާ ބުންޏެވެ.

މީގެ އިތުރުން 48 އަހަރުގެ ބަތަލާ ބުނީ އަދިވެސް އޭނާ އަކީ އެންމެ ކާމިޔާބު ބަތަލާ ކަމަށް ގަބޫލުނުކުރާ ކަމަށެވެ. ކޮންމެ ދުވަހަކީ އެކްޓިން ދަސްކުރަން ޖެހޭ ދުވަހެއް ކަމަށްވެސް އޭނާ ބުންޏެވެ. އަދި މިހާރުވެސް ކުޅެން އުދަނގޫ މަންޒަރުތައް ހުންނަ ކަމަށެވެ.

"އަހަރެން އަދިވެސް ނުދެކެން އަހަންނަކީ ކާމިޔާބު އެކްޓަރެއް ކަމަށް. ސަބަބަކީ އެކްޓިން އަކީ ކޮންމެ ދުވަހަކު ދަސްކުރަމުންދާ ކަމެއް، ކޮންމެ ދުވަހަކު ވެސް ތަރައްގީވަމުން އަންނަ ކަމެއް." ރަވީނާ ބުންޏެވެ.

ރަވީނާ ވަނީ އޭނާގެ ފިލްމީ ކެރިއަރުގައި ކާމިޔާބު ފިލްމުތަކެއް ބެލުންތެރިންނާ ހިސާބަށް ގެނެސްދީފަ އެވެ. އެގޮތުން ފާހަގަ ކޮށްލެވޭ ފިލްމުތަކުގެ ތެރޭގައި "މާތުރު"، "ސައްތާ"، އަދި "ދަމަން" ހިމެނެ އެވެ. އަދި މިފިލުމުތަކަކީ ފާޑުކިޔުންތެރިންގެ ތައުރީފު ލިބިފައިވާ ފިލްމުތަކެވެ.

ރަވީނާ ޓަންޑަން އެންމެ ފަހުން ފެނިގެންދިޔައީ ނެޓްފްލިކްސް ގެނެސްދިން ސީރީޒް "އަރަންޔަކް" އަދި ތަމަޅަ ފިލްމެއް ކަމަށްވާ "ކޭޖީއެފް 2" އިންނެވެ.

ރަވީނާ ޓަންޑަންގެ ކުރިއަށް އޮތް ފިލްމުތަކުގެ ތެރޭގައި އަރްބާޒް ޚާން އާއިއެކު ސޯޝަލް ޑްރާމާ "ޕަޓްނާ ޝުކްލާ" އާއި ސަންޖޭ ދަތު އާއި އެކު ރޮމޭންޓިކް ކޮމެޑީ "ގުދުޗާދީ" ހިމެނެ އެވެ.