ބޮލީވުޑްގެ މަޝްހޫރު ބަތަލާ ރާނީ މުކަރްޒީގެ ކުރިއަށް ހުރި ފިލުމުގެ ޑައިރެކްޓަރަކަށް ބޮލީވުޑްގެ މަޝްހޫރު ކޮރިއަގްރާފާ ވައިބާވީ މާޗަންޓް ހަމަޖައްސައިފި އެވެ.

ބޮލީވުޑް ހަބަރުތައް ގެނެސްދޭ މީޑިއާތަކުގައި ރިޕޯޓްކޮށްފައިވާ ގޮތުގައި މަޝްހޫރު ނެށުންތެރިޔާ ވައިބާވީ ޑައިރެކްޝަނަށް ނުކުންނަނީ ބޮލީވުޑްގެ އެންމެ ބޮޑު ފިލްމު ކުންފުނި ކަމަށްވާ ޔާޝްރާޖް ފިލްމްސް (ވައިއާރްއެފް) އަށް ހަދާ ފިލްމަކުން ކަމަށެވެ.

ކުޑަ ބަޖެޓަކުން ހަދަން ނިންމާފައިވާ ފިލްމުގެ ލީޑު ރޯލުން ވައިއާރްއެފްގެ މިހާރުގެ ވެރިޔާ އަދިތިޔާ ޗޯޕްޅާގެ އަންހެނުން ރާނީ މުކަރްޖީ ފެނިގެންދާނެ ކަމަށް ރިޕޯޓްތައް ބުނެ އެވެ. ރާނީ އަކީ ވައިބާވީގެ ވަރަށް ގާތް އެކުވެރިއެކެވެ.

ރާނީގެ އެންމެ ފަހު ފިލްމަކީ މިދިޔަ މަހު ސިނަމާތަކަށް ގެނެސްދިން ކާމިޔާބު ފިލްމު "މިސިޒް ޗެޓަޖީ ވާސަސް ނޯވޭ" އެވެ.

ވައިއާރްއެފްގެ ވަރަށް ގިނަ ފިލްމުތަކެއްގެ ލަވަތަކުގެ ނެށުން ވައިބާވީ ތައްޔާރުކޮށް ދީފައިވެ އެވެ. އޭގެ ތެރެއިން އެންމެ ފަހުގެ ލަވަ އަކީ ޖެނުއަރީގައި ރިލީޒްކުރި ޝާހްރުކް ޚާނާއި ދީޕިކާ ޕަދްކޯންގެ "ޕަތާން" ގެ "ބޭޝަރަމް ރަންގު" އެވެ.

ކޮރިއޯގްރާގްފާރުންގެ ތެރެއިން ޑައިރެކްޓަރުންގެ ގޮތުގައި ނުކުތް މީހުންގެ ތެރޭގައި ފަރާ ޚާނާއި ރެމޯ ޑި ސޫޒާގެ އިތުރުން ބޮސްކޯ މާޓިސް ހިމެނެ އެވެ.