ބައެއް ސައިކަލްތަކުގެ އިންޖީނު އަޑަށްވުރެ ބާރަށް ވައެއް ލައިގެން އެމެރިކާގެ އަންހެނަކު ދުނިޔޭގެ ރެކޯޑެއް މުގުރާލައިފި އެވެ.

އުމުރުން 33 އަހަރުގެ ކިމްބާލީ ވިންޓާ ވަނީ 107.3 ޑެސިބަލްސް ގެ ވައެއް ލައިގެން ދުނިޔޭގެ އެންމެ ބާރު ވައި (އަންހެން)ގެ ލަގަބު ހޯދާފަ އެވެ.

މީގެ ކުރިން އެ އެންމެ އަޑުގަދަ ވައެއް ލީ އަންހެނާގެ ރެކޯޑު އޮތީ އިޓަލީގެ އަންހެނެއް ކަމަށްވާ އެލީސާ ކަގްނޮނީ އަށެވެ. އޭނާ ލީ ވައިގައި 107 ޑެސިބަލް ހުއްޓެވެ.

ކިމްބާލީ ބުނި ގޮތުގައި ބާރަށް ވައި ލުމަކީ އޭނާ ކުޑައިރު ވެސް ހުރި ހުނަރެއް ކަމަށާއި އަހަރުތަކުގެ މަތިން އެ ހުނަރު އިތުރަށް ފައްކާ ވެފައިވާ ކަމަށެވެ.

އެންމެ ބާރު ވައި ލުމުގެ ކުރިން ކިމްބާލީ ވަނީ އެކި ކަހަލަ ކެއުންތަކާއި ބުއިންތައް ބޭނުން ކޮށްފަ އެވެ. އޭގެ ތެރޭގައި ކާބޮނޭޓަޑް ބުއިންތަކާއި ސޯޑާތައް ހިމެނެ އެވެ.

އާއްމު ތަންތަނުގައި ވައި ލުމަކީ ގިނަ ބަޔަކު ލަދުގަންނަ ކަމެއް ނަމަވެސް އެއީ އެކަމަކާ މެދު އޭނާ ފަޚްރުވެރިވާ ކަމެއް ކަމަށް ކިމްބާލީ ވަނީ ބުނެފަ އެވެ.