ބިހާރަށް ނިސްބަތްވާ ފަގީރު މީހެއްގެ ދަރަނިތައް އަދާކޮށް ދިނުމުން ބޮލީވުޑްގެ އެކްޓަރު ސޯނޫ ސޫދުއަށް ތައުރީފް އޮހެން ފަށައިފި އެވެ.

އިންޑިއާގެ ނޫސްތަކުން ބުނާ ގޮތުގައި ސޯނޫ ވަނީ ކިލާނަންދު ޖާ ނަމަކަށް ކިޔާ އުމުރުން 65 އަހަރުގެ އެ މީހާގެ ނަމުގައި އޮތް 12 ލައްކަ ރުޕީސްގެ ދަރަނި އެއްކޮށް ދައްކާ ޚަލާސް ކޮށްދީފަ އެވެ.

ބުނެވޭ އެގޮތުގައި އެ އަދަދަކީ މި އަހަރު މަރުވި ޖާގެ އަންހެނުންގެ ސިއްހީ ފަރުވާއަށް އޭނާ އެކި ގޮތްގޮތުން ހޯދި ފައިސާ އެވެ. ކުރެވުނު މަސައްކަތުން ފަރުވާ ނުލިބި އަންހެނުން މަރުވިއިރު މުސްކުޅިވި ދުވަހު ޖާގެ ބޮލުގައި އެޅުނީ ބޮޑު ދަރަންޏެކެވެ.

ޖާގެ މި ވާހަކަ އަހައި ސޯނޫ އޭނާއަށް އެހީވެދޭން ނިންމައި ފައިސާ ދޭންޖެހޭ ހުރިހާ ފަރާތްތަކަށް ފައިސާ ދެއްކީ ބަދަލުގައި އެއްެވެސް ކަމަކަށް ޝަރުތު ކޮށްފައެއް ނޫނެވެ.

ސޯނޫއަކީ ފާއިތުވި ޕެންޑަމިކް ތެރޭގައި ވެސް ހާލުގައި ޖެހުނު ފަރާތްތަކަށް އޭނާގެ އަމިއްލަ ޖީބުން އެހީވި ދީލަތި ފަންނާނެކެވެ. އޭނާގެ އިންސާނީ ޚިދުމަތްތައް ފާހަގަކޮށް ގިނަ ޝަރަފުތަކެއް ވެސް އޭނާއަށް އެރުވިފައިވެ އެވެ.

ސޯނޫގެ ބޮލީވުޑް މަސައްކަތްތަކުގެ ތެރޭގައި "ހެޕީ ނިއު އިޔާ"، "ދަބަންގް" އަދި "އެންޓަޓެއިންމަންޓް" ފަދަ ފިލްމުތައް ހިމެނެ އެވެ.