އިޒްރޭލްގެ ފަތުރުވެރިން ރާއްޖެއަށް އައުން މިހާރުން މިހާރަށް ހުއްޓުވައި ދިނުމަށް އެދި މައްޗަންގޮޅި ދެކުނު ދާއިރާގެ މެމްބަރު ހައިތަމް އަހުމަދު، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ކިބައިން އެދިވަޑައިގެންފި އެވެ.

މެމްބަރު ހައިތަމް، ރައީސް މުހައްމަދު ނަޝީދަށް ފޮނުއްވި ސިޓީގައި ވިދާޅުވެފައި ވަނީ އިޒްރޭލުން ފަލަސްތީނުގައި ހިންގަމުންގެންދާ ލާއިންސާނީ ޢަމަލުތަކަކީ ސައްތައިން ސައްތަ މުސްލިމުންގެ ގޮތުގައި ރާއްޖެއިން އޮވެ ބަލައިގަނެވޭނެ ކަމެއް ނޫންކަމަށެވެ.

އިޒްރޭލްގެ ޔަހޫދީން ހިންގާ ލާއިންސާނީ ޖަރީމާއަކީ އިންސާނީ ހައްގާއި ކަރާމާތާއި ދެކޮޅު އަމަލެއްގެ ގޮތުގައި ސިފަކުއްރައްވާ ހައިތަމް ވިދާޅުވީ އިޒްރޭލްގެ ފަތުރުވެރިން ރާއްޖެ އައުން މިހާރުން މިހާރަށް ހުއްޓުވަން ޖެހޭ ކަމަށެވެ. އަދި މި މައްސަލަ ޚާރިޖީ ކޮމިޓީން ބައްލަވައިދެއްވުމަށް، މަޖިލިހުގެ ރައީސް، ރައީސް މުޙައްމަދު ނަޝީދަށް ހައިތަމް ފޮނުއްވެވި ސިޓީގައި ވަނީ އެދިވަޑައިގެންފަ އެވެ.

"ފާއިތުވީ 10 ދުވަސް ވެފައި ވަނީ އަނިޔާވެރިކަން އިންތިހާ އަށް ބޮޑު، ފެން، ކަރަންޓު ފަދަ ޒަރޫރީ ތަކެތި ގާޒާއިން ކަނޑާލާ ދެ މިލިއަނަށް ވުރެ ގިނަ މުސްލިމް ފަލަސްތީނުގެ ރައްޔިތުން ތާށިކޮށްލައި ނެތިކޮށްލަން މަސައްކަތް ކުރަމުން ދިޔަ ދުވަސްވަރެއް،" ހައިތަމްގެ ސިޓީގައި ވަނީ ވިދާޅުވެފަ އެވެ.

ފަލަސްތީނަކީ މުސްލިމުންގެ އެންމެ ފުރަތަމަ ޤިބްލަ ކަމުގައިވާ މަސްޖިދުލް އަޤްޞާވެސް ހިމެނޭ އެންމެހާ މުސްލިމުން ނުހަނު ލޯބިވާ މުޤައްދަސު ބިންކަން ވަނީ ހައިތަމް ސިޓީގައި ވަނީ ފާހަގަކުރައްވާފަ އެވެ.

އިޒްރޭލުން ގާޒާ އަށް ދެމުން ގެންދާ ހަމަލާތައް ކުށްވެރިކޮށް، އެ މައްސަލާގައި ފިޔަވަޅު އެޅުމަށް ސަރުކާރަށް ގޮވާލައި ރައްޔިތުންގެ މަޖިލީހަށް ގަރާރަކާއި ކުއްލި މައްސަލައެއް ވެސް ހުށަހަޅައިފައިވެ އެވެ. އެއް މައްސަލައެއްގައި ދެ މައްސަލައެއް ހުށަހަޅައިފައިވުމުން ގަރާރަށް ޖާގަ ދީ ކުއްލި މައްސަލަ އެޖެންޑާކޮށްފައެއް ނުވެ އެވެ.