"ކޮފީ ވިތު ކަރަން"ގެ ސަބަބުން އޭނާއަށް ލިބުނުހާ ވެސް އެއްޗަކީ ދުޝްމަނުން ކަމަށް ބޮލީވުޑްގެ މަޝްހޫރު އެކްޓަރު އިމްރާން ހަޝްމީ ބުނެފި އެވެ.

އިމްރާން މިހެން ބުނެފައިވަނީ އިންޑިއާގެ ނޫހަކަށް ދިން އިންޓަވިއުއެއްގަ އެވެ. އެ އިންޓަވިއުގައި އޭނާ ވަނީ ކޮފީ ވިތު ކަރަންއާއެކު އޭނާ ކުރި ތަޖުރިބާއާ ބެހޭ ގޮތުން ވާހަކަ ދައްކާފަ އެވެ.

ކޮފީ ވިތު ކަރަންގެ ހަތަރުވަނަ ސީޒަންގައި މަހޭޝް ބަޓްއާއެކު އިމްރާން ބައިވެރިވިއިރު ޝޯގެ ތެރެއިން އޭނާ ދެއްކި ބައެއް ވާހަކަތަކަށް ގިނަ ބައެއްގެ ފާޑުކިޔުމާއި ރުޅިވެރިކަން އަމާޒުވި އެވެ.

އެގޮތުން ޝޯގެ ރެޕިޑް ފަޔާ ރައުންޑްގައި އައިޝްވާރްޔާ ރާއީގެ ނަން އިވުމުން އެންމެ ފުރަތަމަ ހިތަށް އަންނަނީ ކޮން ބަހެއްތޯ ސުވާލު ކުރުމުން އިމްރާން ބުނީ "ޕްލާސްޓިކް" ކަމަށެވެ.

އެއާއެކު އޭނާއަށް ބޮލީވުޑްގެ ތެރެއިންނާއި ބޭރުން ފާޑުކިޔުން އަމާޒުވިއިރު ފަހުން އޭނާ ވަނީ އެއީ ޝޯގައި ދޭ ހަދިޔާގެ ބޭނުމުގައި ބުނި ބަހެއް ކަމަށް ބުނެ މައާފަށް ވެސް އެދިފަ އެވެ.

ހަމަ އެ ޝޯގައި އިމްރާން ވަނީ ޝްރައްދާ ކަޕޫރުގެ ހަށިގަނޑަށް ފާޑުކިޔައި އޭނާ "ކޮންމެވެސް އެއްޗެއް ކާން ޖެހޭ ކަމަށް" ބުނެފަ އެވެ.

އެ ތަޖުރިބާއަށްފަހު ރިއަލިޓީ ޓޯކް ޝޯތަކަށް ނާރަނީ ކީއްވެގެންތޯ ސުވާލު ކުރެވެމުން އިމްރާން ބުނީ ދެންވެސް އަރައިފިނަމަ އެކަހަލަ މައްސަލަތަކެއް ނުކުމެދާނެ ކަމުގެ ބިރު ހީވާ ކަމަށެވެ.

އިމްރާން މިހާރު އަންނަނީ އޭނާގެ އެންމެ ފަހުގެ ފިލްމު "ޓައިގާ 3"އަށް ލިބެމުން އަންނަ ކާމިޔާބީ ފާހަގަ ކުރަމުންނެވެ. ސަލްމާން ޚާންއާއި ކެޓްރީނާ ކައިފްގެ އެ ފިލްމުގައި އިމްރާން ފެނިގެންދަނީ ނެގެޓިވް ރޯލަކުންނެވެ.