ގިނަ ބައެއްގެ ލޯބި ހޯދާފައިވާ ބޮލީވުޑްގެ ޖޯޑެއް ކަމަށްވާ އަބީޝޭކް ބައްޗަންއާއި އައިޝްވާރްޔާ ރާއީގެ ކައިވެނީގައި މައްސަލަތަކެއް ޖެހި އެ ދެމީހުން ވަރިވެފައިވާ ކަމަށް އަޑުތައް އަރައިފި އެވެ.

ދެމަފިރިންގެ މެދުގައި މައްސަލަ ޖެހެން މެދުވެރިވި ސަބަބެއް އެނގިފައި ނުވި ނަމަވެސް އައިޝްވާރްޔާ މިހާރު އަބީޝޭކްގެ ގެއިން ނުކުމެފައިވާ ކަމަށް ބުނާ ރިޕޯޓުތައް ވެސް ވަނީ އާއްމުވެފަ އެވެ.

މިއިން އެއްވެސް ހަބަރެއް އެ އާއިލާގެ އެއްވެސް މީހަކު ޔަގީން ކޮށްދީފައި ނުވާއިރު ވަރަށް ފަހުން އެ ދެމަފިރިން ވަނީ އަމީތާބް ބައްޗަންއާއެކު ދަރިފުޅު އާރަދްޔާ ބައްޗަންގެ ސްކޫލް އިވެންޓެއްގައި ބައިވެރިވެފަ އެވެ.

އަބީޝޭކްއާއި އައިޝްވާރްޔާގެ ކައިވެނީގައި މައްސަލަތަކެއް ޖެހިގެން އުޅޭ ކަމަށް ދެކެވޭ ވާހަކަތައް މީޑިއާގައި ފެތުރޭތާ ދުވަސްތަކެއް ވެއްޖެ އެވެ. އެހެން ނަމަވެސް އޭގެ ފަހުން އެތައް ފަހަރަކު އެދެތަރިން އެކުގައި ވެސް އެކިތަންތަނުން ފެނިފައިވެ އެވެ.

އަބީޝޭކްއާއި އައިޝްވާރްޔާ ކައިވެނި ކޮށްފައިވަނީ 2007 ވަނަ އަހަރުގެ އޭޕްރީލް މަހުގެ 20 ވަނަ ދުވަހު އެވެ. އެ ކައިވެންޏަށް އާރަދްޔާ ލިބުނީ 2011 ވަނަ އަހަރުގެ ނޮވެމްބަރު މަހުގެ ތެރޭގަ އެވެ.