މިފަހުން ނެޓްފްލިކްސްއަށް އަލަށް ތައާރަފްވި ފިލްމެއް ކަމަށްވާ "ދަ އާޗީސް"ގެ ޓީމުން މިވަނީ އެ ފިލްމު ޕްރޮމޯޓް ކުރުމަށްޓަކައި އަމީތާބު ބައްޗަންގެ ގޭމް ޝޯވް "ކޯން ބަނޭގާ ކްރޯޑްޕަތީ"އަށް ގޮސްފަ އެވެ.

ސުހާނާ ޚާންއާއި ޚުޝީ ކަޕޫރުގެ އިތުރުން އަގަސްތުޔާ ނަންދާ އެ ޝޯއަށް ދިއުމުން އަމީތާބު ވަނީ ގޭމުގެ ގަވާއިދުތަކުގެ މަތިން އެ ތަރިންނާ ކޮންމެވެސް ވަރަކަށް ސުވާލު ވެސް ކޮށްފަ އެވެ.

އެކަމުގެ ތެރެއިން އާއްމުންނަށް އެންމެ ފާހަގަވި ކަމަކީ ސުހާނާ ޚާންއަށް އޭނާގެ ބައްޕަ ޝާހްރުކް ޚާންއާ ބެހޭ ގޮތުން ކުރެވުނު ސުވާލަކަށް ޖަވާބު ދޭން ނޭނގުމުންނެވެ.

އެ ސުވާލުގައި ހަތަރު އިހުތިޔާރީ ޖަވާބަކާއެކު އަމީތާބު ސުހާނާއަށް ހުށައެޅި ސުވާލަކީ އެ އިޚްތިޔާރީ ޖަވާބުތަކުގައިވާ ޝަރަފުތަކުގެ ތެރެއިން ޝާހްރުކް ޚާންއަށް ނުލިބި އޮތް ޝަރަފަކީ ކޮބައިތޯ އެވެ.

އެ ސުވާލުގެ ޖަވާބުގައި ސުހާނާ ނުބައި އިޚްތިޔާރެއް ޚިޔާރު ކުރުމާއެކު އަމީތާބު ވަނީ ބައްޕައާ ބެހޭ ގޮތުން މައުލޫމާތު ނުހޯދަންތޯ ސުހާނާއާ ސުވާލުކޮށްފަ އެވެ.

ސުހާނާގެ މި ޖަވާބާއެކު އާއްމުން ވެސް އަންނަނީ ޝާހްރުކް ޚާންއާއި ސުހާނާގެ ގުޅުމާމެދު ސުވާލު އުފައްދަމުންނެވެ. ސުހާނާއަކީ ޝާހްރުކް ޚާންއާއި ގައުރީ ޚާންގެ ދެވަނަ ދަރިފުޅެވެ.