އިނގިރޭސި ވިލާތުން ނެރޭ "އޭޝިއާގެ އެންމެ ގަދަ 50 ސެލެބްރިޓީ" ލިސްޓުގެ އެއްވަނަ ބޮލީވުޑްގެ ސުޕަ ސްޓާ ޝާހްރުކް ޚާންއަށް ލިބިއްޖެ އެވެ.

މިދިޔަ ހުކުރު ދުވަހު އާއްމުކުރި އެ ލިސްޓުން ޝާހްރުކް ޚާން ކުރި ހޯދާފައިވަނީ ބޮލީވުޑް ތަރިންގެ އިތުރުން އޭޝިއާ ބައްރުގައި ފާހަގަ ކޮށްލެވޭ އެހެން އެކްޓަރުން ވެސް ފަހަތަށް ޖައްސާލުމަށްފަހު އެވެ.

މިއަހަރު މިހާތަނަށް ރިލީޒްކޮށްފައިވާ ދެ ފިލްމު، ޕަތާން އަދި ޖަވާންގެ އިތުރުން މި ޑިސެމްބަރު މަހު ރިލީޒްކުރާ "ޑަންކީ"އާއެކު ޝާހްރުކް ޚާން ވެފައިވަނީ އާމްދަނީގެ ގޮތުން ބަލާއިރު ވެސް މި އަހަރުގެ އެންމެ ކާމިޔާބު ބޮލީވުޑް ތަރިއަށެވެ.

ޝާހްރުކް ޚާންގެ ފަހަތުން ލިސްޓުގެ ދެވަނަ ހޯދާފައިވަނީ ޒުވާން ތަރި އާލިއާ ބަޓް އެވެ. އާލިއާ އެންމެ ފަހުން ފެނިގެން ގޮސްފައިވަނީ ކަރަން ޖޯހަރުގެ "ރޮކީ އޯރް ރާނީކީ ޕްރޭމް ކަހާނީ"އިންނެވެ.

ޝާހްރުކް ޚާންއާއި އާލިއާގެ އިތުރުން އެ ލިސްޓުގެ ގަދަ 10 ތަރިންގެ ތެރޭގައި ޕްރިޔަންކާ ޗޯޕްރާ، ރަންބީރު ކަޕޫރު، ދިލްޖީތު ދޯސަންޖް އަދި ޝްރެޔާ ގޯޝާލް ފަދަ ތަރިން ހިމެނެ އެވެ.

ފާހަގަ ކޮށްލަން ޖެހޭ ކަމަކީ 50 ތަރިން ހިމެނޭ މުޅި އޭޝިއާގެ އެ ލިސްޓުގައި ގިނައިން ހިމެނިފައިވަނީ ބޮލީވުޑްގެ އެކްޓަރުންނާއި ލަވަކިޔުންތެރިން ކަމެވެ.