ބޮލީވުޑްގެ ކާމިޔާބު ގިނަ ފިލްމުތަކަކުން ފެނިގެން ގޮސްފައިވާ ޝާހިދު ކަޕޫރާއި އޭނާގެ އަންހެނުން މީރާ ރާޖްޕުޓް އާ ކާރެއް ގަނެފި އެވެ.

އިއްޔެ އިންޑިއާގެ ނޫސްތަކުން ހާމަކުރި ގޮތުގައި އެ ދެމަފިރިން ގަނެފައިވަނީ މާސިޑީސް މޭބެޗް ޖީ އެލް އެސް 600 މޮޑެލްގެ ކާރެކެވެ. އެ ކާރުގެ އަގު 3.5 ކްރޯޑް އިންޑިއާ ރުޕީސްއަށް އަރަ އެވެ.

މާސިޑީސް މޭބެޗް އިންޑިއާގެ ރަސްމީ ފޭސްބުކް ޕޭޖުގައި އެ ކާރުގެ ތަޅުދަނޑި ޝާހިދުގެ ދެމަފިރިންނަށް ހަވާލު ކުރަނިކޮށް ނަގާފައިވާ ފޮޓޯއެއް ވެސް އާއްމުކޮށްފައިވެ އެވެ.

ޝާހިދުގެ އިތުރުން މާސިޑީސްގެ އެ މޮޑެލްގެ ކާރުތައް ގެންގުޅޭ ބޮލީވުޑް ތަރިންގެ ތެރޭގައި ރަންވީރު ސިންހް، އަރްޖުން ކަޕޫރު އަދި ކްރިތީ ސެނަން ހިމެނެ އެވެ.

ފިލްމީ މަސައްކަތްތަކަށް ބަލާއިރު ޝާހިދު މިއަހަރު ފެނިގެންދިޔައީ "ފަރްޒީ" އާއި "ބްލަޑީ ޑެޑީ" އިންނެވެ. އޭނާގެ ކުރިއަށް އޮތް ފިލްމަކީ އަންނަ އަހަރު ނެރުމަށް ހަމަޖެހިފައިވާ "ދޭވާ" އެވެ.