ސަންޖޭ ދަތުއާއި ރިޝީ ކަޕޫރަކީ އެމީހުންގެ ފިލްމީ ހަޔާތުގައި ފާހަގަ ކޮށްލެވޭ މަސައްކަތްތަކެއް ކޮށްފައިވާ ދެ ފަންނާނުންނެވެ. އެހެން ނަމަވެސް އެ ދެމީހުންގެ ޒާތީ ދިރިއުޅުމުގައި ކޮންމެވެސް ވަރެއްގެ މައްސަލަތަކެއް އުޅުނެވެ.

އެގޮތުން ސަންޖޭ ދަތުއާއި ގުލްޝަން ގްރޯވަރް އެކުގައި ރިޝީއަށް ހަމަލާ ދިނުމަށް އޭނާގެ ގެއަށް އައި ކަމަށް ރިޝީގެގެ އޮޓޯބައޮގްރަފީ "ކުއްލަމް ކުއްލާ: ރިޝީ ކަޕޫރު އަންސެންސާޑް"ގައި ބުނެފައިވެ އެވެ.

ސަބަބަކަށް ވެފައިވަނީ 1981 ވަނަ އަހަރު ފިލްމު "ރޮކީ"ގެ މަސައްކަތް ކުރިއަށް ދިޔައިރު ސަންޖޭ ދަތު ލޯބީގެ ގޮތުން ގުޅިގެން އުޅުނު ޓީނާ މުނިމްއާއި ރިޝީގެ ގުޅުމެއް އޮންނަ ކަމަށް އަޑު ފެތުރުމުންނެވެ.

ސަންޖޭގެ ރާ ބުއިމާއި ޑްރަގްސް ބޭނުން ކުރުމުގެ އާދަތަކުގެ ސަބަބުން އޭނާއާއި ޓީނާގެ ގުޅުން ނިމުމަކަށް އައިއިރު ޓީނާ ވަނީ ފަހުން މަހުޖަނު އަނިލް އަމްބާނީއާ ކައިވެނި ކޮށްފަ އެވެ.

ބުނެވޭ ގޮތުގައި ސަންޖޭއާއި ގުލްޝަން ރިޝީގެ ގެއަށް އޭނާއަށް ހަމަލާ ދޭން އައުމުން އެކަން ހުއްޓުވީ ރިޝީގެ އަންހެެނުން ނީތޫ ކަޕޫރު އެވެ.

މި މައްސަލައާއެކު ވެސް ފަހުން އެ ދެތަރިންގެ މެދުގައި ރަނގަޅު ގުޅުމެއް އޮތެވެ. އެގޮތުން ސަންޖޭގެ ބައޮގްރަފީ ފިލްމު "ސަންޖޫ"ގެ ލީޑު ރޯލުން ވެސް ފެނިފައިވަނީ ރިޝީގެ ދަރިފުޅު ރަންބީރު ކަޕޫރު އެވެ.