ބޮލީވުޑްގެ ނުފޫޒަކީ މުޅި ދުނިޔޭގައި ވެސް ފާހަގަ ކުރަންޖެހޭ ކަމެކެވެ. ހިންދީ ފިލްމުތަކާއި އެ ފިލްމުތަކުގެ ލަވަތައް ދުނިޔޭގެ ފެންވަރުގެ އެވޯޑުތަކުންނާއި ޗާޓުތަކުން އަބަދުވެސް ޖާގަ ހޯދަ އެވެ.

އެގޮތުން މިފަހަރު މިއޮތީ ދުނިޔޭގެ އެންމެ ގިނަ މީހުންގެ މެދުގައި މަގުބޫލު 50 ލަވަ ހޮވި ޗާޓެއްގެ ގަދަ 10ގައި ހިމެނުނު ލަވައެއްގެ ވާހަކަ އެވެ.

1998 ވަނަ އަހަރު ނުކުތް ފިލްމު "ދިލްސޭ"ގެ ލަވައެއް ކަމަށްވާ "ޗައްޔާ ޗައްޔާ" ވަނީ ބީބީީސީ އިން 2002 ވަނަ އަހަރު ހުޅުވާލި ޕޯލް ޗާޓަކުން ނުވަވަނައަށް ހޮވިފަ އެވެ.

ޝާހްރުކް ޚާންއާއި މަލައިކާ އަރޯރާ ޚާން ރޭލެއްގެ މަތީގައި ނަށާ މަންޒަރު ފެންނަ އެ ލަވަޔަކީ ސުކްވިންދަރް ސިންހްއާއި ސަޕްނާ އަވަސްތީ ކިޔައިދީ ފަރާ ޚާން ކޮރިއޮގްރަފީ ހެދި ލަވަ އެކެވެ.

ސޫފީ ޅެމަކަށް ހަދާފައިވާ އެ ލަވައަށް ވަނީ ފިލްމްފެއާ ތިން އެވޯޑާއި ސްޓާ ސްކްރީން އެވޯޑެއް ވެސް ލިބިފަ އެވެ. އެއީ ލަވަ ކިޔުމާއި ކޮރިއޮގްރަފީގެ ކެޓަގަރީއިންނެވެ.

"ޗައްޔާ ޗައްޔާ"އަކީ ދިވެހިންގެ މެދުގައި ވެސް އެއް އިރެއްގައި ވަރަށް މަގުބޫލުވި ލަވަ އެކެވެ. މާލޭގެ ގެތަކުން އަޑުގަދަކޮށް ޖެހި ލަވަ އެކެވެ.