ރާޖް ކުމާރު ހިރާނީއަކީ މިވަގުތު ބޮލީވުޑްގައި މަސައްކަތްކުރާ އެންމެ ތަޖުރިބާކާރު އެއް ޑައިރެކްޓަރެވެ. އޭނާ ވަނީ ބޮލީވުޑްގެ ނަން ހިނގާ ހުރިހާ އެކްޓަރުންނާއެކު ވެސް މަސައްކަތް ކޮށްފަ އެވެ.

އެހެން ނަމަވެސް ސުޕަސްޓާ ޝާހްރުކް ޚާންއާއެކު ފިލްމެއްގެ މަސައްކަތް ކޮށްފައިވަނީ މި އަހަރު އެވެ. ޝާހްރުކްއާއެކު މަސައްކަތް ކުރުން އެހާ ލަސްވި ސަބަބާ ބެހޭ ގޮތުން ހިރާނީ މިވަނީ ވާހަކަ ދައްކާފަ އެވެ.

ހިރާނީ ބުނީ އޭނާ ފިލްމު ސްކޫލުގައި ކިޔަވަމުން ދިޔަ ދުވަސްވަރު ދެއްކި ސީރީޒްއެއް ކަމަށްވާ ސާކިސްއިން ޝާހްރުކް ޚާން ފެނުނީއްސުރެ އޭނާއާއެކު މަސައްކަތްކުރަން ހިތުގައި އަޒުމް ކަނޑައެޅި ކަމަށެވެ.

ދެ އަހަރު ފަހުން ފިލްމު ސްކޫލުން ނިމުނުއިރު ޝާހު ބޮޑު ސްޓާރަކަށް ވެއްޖެ ކަމަށާއި ދާއިރާއަށް އާ މީހެއް ކަމުން އޭނާއާއެކު އެ ދުވަސްވަރު މަސައްކަތް ކުރަން އުނދަގޫވީ ކަމަށް ހިރާނީ ބުންޏެވެ.

އެހެންކަމުން ޝާހްރުކްއާ އެއް ފެންވަރަކަށް އަންނަން 20 އަހަރު ނެގި ކަމަށާއި އެ މުއްދަތުގައި އޭނާއާއެކު މަސައްކަތް ނުކުރީ ކަމަށް ވެސް ހިރާނީ ބުނެފައިވެ އެވެ.

ހިރާނީގެ ފާހަގަކޮށްލެވޭ މަސައްކަތް ތަކުގެ ތެރޭގައި ޑަންކީ (2023)، ސަންޖޫ (2018)، ޕީކޭ (2014) އަދި ތުރީ އިޑިއަޓްްސް (2009) ފަދަ ފިލްމުތައް ހިމެނެ އެވެ.